عز الله ان القلب يازين عافك

[فواز الغسلان]

عـز الله ان القلب يـازيـن عـافـك=من عـقـب مـاني في مجـافـاك مااطـيع
ونزعت عن دفـتـر هوانا غلافك=ومسحت انا عـقـبـك جـمـيع المواضيع
دام الحشى عامين يشكي جـفافك=وطـاحـت قـبالي ذكـريـات ومشـاريـع
ورميت قلبي في غـيـاهب رفافك=وركـضـت تـبــي الـمـصـلـحـه والمنافيع
مظعـونـنـا ياداعـج الـعـين طـافك=واللي رحل مـالـه مـع الـوقـت ترجـيع
ياما رجـى الخـافـق لـيالي زفـافك=كـنـه يـشـيـل ضـروسـنـــا بـالـمـقـالـيـع
وياما طفح جـاشـي بـنـيـران قافك=مـثــل الجـواهـر بالـعـقـود الـلـوامـيـع
وقريت جيم الناس من عقب كافك=ونـثـرت قـيـفــان تـشـيب الـمراضيع
صعب على درب المحـبـه عسافك=مع علـمـك اني فيك مااشـري ولاابيع
شفتوا مراكـبـنــا رست في ضفـافك=والقلب شام عن الـبـنـات الـمـفـاريع
وشلفاي بانت يوم طاحت شلافك=وحاميت دونك في وقوت الـمفازيع
ونامت عـيـونك هـانـيـه في لحـافك=يوم اصبحوا ربعك هـجـيـج الجرابيع
شالك هواء العاصف ليالي قطافك=من عـقــب ماغـارت جـمـيـع الينابيع
وطيبي رجـع لي في مواري عيافك=تضحـك وتـقـــطـع وصـلـنـا بالاسابـيـع
وان كنت تجـحـد طيبنا باعـتـرافك=وتعـرب على الـمـاضـي فعول مضاريع
واظهرت في جرح القلوب احترافك=ودفـنـت حبي بالخـفـى دون تشيـيـع
وانهيت سـعـيـك قبل تنهي طوافك=ولقيت لجروحك من الناس تشجـيع
من حاسد في حـلـيـة الـزين شافك=وهجسك رجع بك للوقوت المخــاديع
لاتحـسـب انـي طـايـح في كـتـــافك=والا مـع الـلـــي بالـشـوارع مـجـاديع
قلبي يعـيش بـحـضـرتـك وانصرافك=وفي غيـبـتـك والله تـرانـي فلا اضيع
اصبحت للـمـاضـي يـزيــد انجـرافـك=الـلـــي رمـاكـم بالـــمــــذلـه مـصـاريــع
وعقب اختلافي يالغلا واخـتـلافـك=فــارق وتـال الـهــرج بـوسـه وتـوديع

[سناعيس]

صعب على درب المحبـه عسافـك
مع علمك اني فيك مااشري ولاابيع

الله الله يافواز

صح لسانك مليون
لله درك

تحياتي

فواز

صح الله لساانك

اشهد انها جززله

سلمت يمنااك وفكرك على هالابدااع

لا هنت

موج القصيد

[زهرة اللوتس]

الشاعر/ فواز الغسلان
سلمت وسلم فكرك
صح الله منطوقك
وبيض الله وجهك

جزلة من شاعر جزل
تقبل
تحياتي
وتقديري

[ماجد الزيد]

مبدع يالغسلان
صح الله لسانك وجاد بنانك
تحياتي وتقديري

[الطامي]

الغسلان
ومضعونا ياداعج العين طافك ؟؟؟؟؟؟؟؟؟؟؟؟؟؟ ابداع دائم
صح السانك وبنانك اخي
وافية من وافي
شكرا لك

[حوريه]

قلبي يعيش بحضرتك وانصرافـك
وفي غيبتك والله تراني فلا اضيـع

شاعرنا فواااز

قصيده رووووووووعه

صح قلبك ولا هنت

[عذب القوافي]

الجزل / فواز الغسلان

صح لسانك

نص وافي من وافي

لله درك يالغالي

ونزعت عن دفتـر هوانـا غلافـك
, , , ,. , , , , , , ومسحت انا عقبك جميع المواضيع

تقديري,,,,,,,

[عبدالرحمن بن زهير]

الشاعر فواز الغسلان مدري وش اكتب لكن اذا كان للشعر مدرسه فأنت من يديرها وإذا كان للجزالة عنوان فأنت وطنها ، بيض الله وجهك على هذا الشموخ وتقبل تحياتي واعجابي الشديد.....

[الخنساء]

صح لسانك ولاهنت

ابيات رائعة

سلمت ودمت بخير