محمد الأحمد السديري

[الطائر المهاجر]

ان هاجت أفكاري علي وتزايدت=تصور بعيني ساعة الحشر قايمه
تلاطم هموم القلب بالصدر كنها=ملاطم الامواج بالبحر عايمه
هم يفارقني وهم يزورني=وهم يزايمني وهم أزايمه
اسلي فوادي بالهموم وغايتي=إلى مرقب قلبي يحبه ورايمه

[الطائر المهاجر]

سلمى تقول ان الموده غرابيل =وانا على سلمى عليل الضماير
سلمى تقول الحب ويلٍ بثر ويل = وانا حشاي بجاير الحب فاير
وسلمى لها بقصى الضماير مداهيل = وعندي لسلمى بالموده سراير
اسأل عليها كل ما يقبل الليل=والصبح اوصي يمها كل طاير
الحب في قلبي صبغ صبغة النيل=بين المحاني صايب الحب جاير
وياما توجَّد والضماير مغاليل=وياما على سلمى عطيت البشاير
طفلٍ سلب عقلي بسودٍ مضاليل=منها قلوب اهل الموده عثاير
ورموش سودٍ ما تكحل من الميل= سواه خلاق البحر والجزاير
دارٍ لسلمى ما تجيها المراسيل=دارٍ لقلبي في حماها ذخاير
ارسل لها من ناحلات المراميل=ما يصلنه ناقلات المجاير
اطلب لها من رايح المزن بالسيل=منه الزبيدي نابتٍ بالمحاير

[الطائر المهاجر]

قالوا عــلامك باكي قـــلت مطعون=شـوفـو نزيف الـدم مني تتالا
قالوا من اللي صوبك قالت عافـون=قـالوعــدوك قالت يانـاس لالا
هذا الحبيب الي له القلب مرهـون=هـذا حياة الروح بدر الكمالا
يا عـــاذلين القلب لا لا تــعذلـون=وحــياة رب فـوق عـرشه تعالا
اني فـــلا انسى واحــد فيه مفتون=بيني وبينه نازح البعد حـالا
فتـــان صاب القلب كـون بثر كون=مملوح اخذ كل البها والجمالا
كنه الى حــرك قـوامه على الهون=غصــن الى هب الهوا فيه مالا
قـــلبي لقلبه لو تنحيت مرهــون=غـــيره حرام ونور عيني حلالا

[الطائر المهاجر]

لا تناظر منك شفت أشنع جريمه =في حياتي سجلت موتٍ قبرها
حالتي ويّاك يا خلّي سقيمـــــه =ما تعرف البر وينه من بحرهـا
المشاعر منك فيك أمست يتيمه =ما نبي لاماك حيث إنك كدرها
دونك أعذارك تراها لك غنيمـه =احتفظ فيها ترى ماحدٍ نشرهـا
وحبّك اللّي خابره عزّى نديمه =واستراح وراح يبحث عن قدرها
مــا بقا لك كود أطلالٍ قديمـه =ليت لى قدره واكسّر في حجرها
واجعل القيعان عقبك مستقيمه =وأتلذّذ وامِن بصافي نهرهـــــــــا
يوم ابو زيد الشمالي قال شيمه =مـا خـذيتـي ذرةٍ ممّــا بـثـرهــــــا

[عبدالعزيز-]

حقيقه كفيت ووفيت يالطائر المهاجر وبيض الله وجهك على هالجهد الكبير - فيه بيت شعر يحضرنى لسديري واردده صارلى اكثر من عشر سنين طبعن من قصيده اجزم تتكون من 6 ابيات او خمسه البيت يقول : فـــات رمضــان وفات شوال يقفــاه = والفطر الاخر فــات والروح نعبــه = والقلب ضاق وعييــــت تتسعبه حناياه = ولوهو ظهر كل الفضى ماتسع بــــه

[منيع]

السديري قمه في الشعر لاتجارى
وهو الشاعر الذي حببني للشعر النبطي
رحمه الله رحمه واسعه واسكنه الفسيح من جنته
والشكر موصول للاخ الرائع الطائر المهاجر
على اتحافنا بهذه الابيات الدرة النفيسه
تحياتي وتقديري

[بدر بن عيد]

مرقا العلا خطرٍ عسيرٍ صعوده = مايطلعه من لاتجلد على الكود
والبيت مايبنى بليا عموده = والحيف يزعل من عن الحق مردود
والحر يجزع يوم توطأ حدوده = وتشرهه نفسه على الطيب والزود
ولايشتكي من لا تضره لهوده = إن شاف جور الحيف والعدل مفقود
والوقت شفنا كل بيضه وسوده =وشفنا نهار مع لياليه مضهود
والغيم لو تسمع صواعق رعوده = لاممطرٍ وبلٍ ولا هوب مريود
يامدورين الطيب قيسو عدوده = والطيب عدٍ بين الاجواد مارود
والناس بأرض الله تراهم شهوده = وحق بلا فعل على الرجل مجحود
والنذل حيلات الردى ماتكوده = واليا بغا الطولات مايدرك الجود
عن المراجل قاصرات زنوده = طير العشا يصبر على كل منقود
الخيل ماتشتكي مضاريب عوده = وبالقيض ماركب النضا مثل صاهود
يعيش في دنياه همه رقوده = ولا نفضنه قرح الخيل والقود
لا عل رحمة خالقه ماتعوده = وعساه مع زمرة هل النار بخلود
هـذا زمـان هايبات فهوده = والناس نادو عنترة بسم مسعود
واشوف لي رجلٍ يعدد جدوده = لو أن أبوه وجده اضعف من الدود
كلت من المأطاء رواسي حيوده = والبوم شاش ولابسٍ درع داوود
والنيص حط لهامة الراس خوده = عقب المذله له طوابير وجنود
ماكن شيء في زمانه يكوده = شاهد بها الدنيا سلامات وركود
وحتى الغراب اليوم يفخر بجوده = والفأر بذراعه قطع كل بالود
والشري والحرمل تباهت وروده = وقامت تشيل غصونه الماس وعقود
ياحسين زانت له ليالي سعوده=وصدق حياه بزايد الوبل ورعود

[بدر بن عيد]

وراك تورينا الجفا والقطيعه =وحنالك اطوع من بنان اليديني
نشري رضاك وكل شيء نبيعه =وحياة رب يبعث الميتيني
ونمشي بشف ارضاك وامرك نطيعه =اللي يصيبك عارف انه يجيني
لو ان نفسي للمعالي رفيعه =بالعين اجلك جاعلك لي ضنيني
ايامنا هي والليالي سريعه =ومازان بالدنيا لزوم يشيني
الله كفيل الناس وارضه وسيعه =عالم خفا يا نية الجاحديني
لابد من يوم نشوف الشنيعه =ونتبع طريق اجدودنا الاوليني
الروح تبقا لين يا صل وديعه =والأجل مكتوب بعال الجبيني
نفسي لها عشرين عام وجيعه =ويشهد على ما قلت عوج السنيني
إلى تبها نجد واقبل ربيعه =نشوف شيء فطن الغافليني
وبغضت شوف الناس جمعاً جميعه =وقمت اتمنا منزل الفرقديني
من ربعنا الادنين شفت الهزيعه =وقد قالو الناس المغطا يبيني
وشفنا الحقايق واكتشفنا الخديعه=لاشك ضاع الحق يالفاهميني
حقي غدو به مبغضين الشريعه =غدو به الانذال يالغانميني
وبنيت رجم وقلت هذا مضيعه =حتى يعرفون الخطا اللاحقيني
لو هو بالايدي كان اخذته قريعه =غصب على الحساد والمبغضيني
وقمت اتذكر فعل راع البديعه=وقت زمانه شيب المصغريني

[بدر بن عيد]

الطيب دمعه والردى ضحكةحجاج=ونفسك قبل لا تلوم الأيام لـمهـا
لو المراجل طالها كل هراج=رخصة فعايلها وقلة شيمها
الجهل غدراء ليل والحكمة سراج=والخلـق شــاره والمنايـا سهمــها
والضيق سجن البال والسجة إفراج=وأن ضامتك خطوى المقاريد ضمها
لو الرجال تقاس بالبشت والتاج=مانفرق شيوخ العرب من خدمها
ولو كل من تارد بهقوتك هداج=ماشفت كبد ناشفه من وهمها
ناسٍ فرقها وجودها بين الأفواج=وناسٍ تساوى وجودها مع عدمها
وقت يهيج ويصطفق مثل الأمواج=نبـني الأماني والظنون تهدمها
من جرب الحاجة عذر كل محتاج=ناسٍ عطاها الله وناسٍ حرمها
ماعاد يمدي والحكي دونه سياج=لكن تهجى كلمتي وأفتـهمـها
أما تجي بحراج وتروح بحراج=وألا تــثـمـن جيتك وتحشمها