نشرب قراح او علّنا ما شربنا

[ماجد الزيد]

هذي ثلاث سنين ما بان خافي=درنا معاها ياعرب ما تعبنا
ارياقنا ما بلها غير صافي= نشرب قراح او علّنا ما شربنا
نصبر على المقرود ولا عوافي=نضرب وحنّا لا ضربنا عطبنا
نقدم ونغنم ونْتوعّد ونافي=وناطى بروس الجن لامن حربنا
اقلوبنا بيضا وحنّا نظافي= واللي بعد عنّا فلا له قربنا
و خوينا لا بان منّه خلافي= ندمح له الزلّه ونكتم غضبنا
ون صار بالعليا من النّاس هافي=امّا نزل ولاّ من الدّار طبنا
الحرّ ما تذرى عليه السّوافي=وحنّا خلاف النّايفة ما طلبنا
لو دونها كاس الحمام بيدافي=بشفاهنا يرغب وحنّا رغبنا
سلومنا من يوم حنّا حوافي=لا عابت الدنيا فلا تقول عبنا
لو عاب كل الخلق حنّا صوافي=شفنا غرب بديارنا وغتربنا
ياما دفنّا همّنا بالقوافي=ويا دمحنا زلة ٍ من عربنا
الخير يقعس واسود الشّر غافي=كانه صحى لحزامنا قد كربنا
الليل خرمس والبدر فيه طافي=وصلِف العواصف نوحها هو طربنا
تعوي على المشراف تبكي سنافي=وناقف لها توجيب نحبس خببنا
ننحر لها من مكرمات الشّعافي=ونسكب لها من خمرنا لا صببنا
وين انت يا سعدون 1 وانت المكافي=تنظر بعينك كيف طفّوا حطبنا
الهيس يسقي للأصيل الزّعافي=وبيت الرّدى برفاع يا مير يبنا
الوقت ذا يا مير كلّه كسافي=انا اشهد انّا من مواريه شبنا
ياليت ما نفنى بغير الرّهافي=و يا هقوتي نبلى وهو ما ندبنا

1- الأمير سعدون بن عريعر محير بيض النعام

[سلطان العطاوي]

ماجد الزيد

حجز لك بمرتبة وزير

ولي عوده للقصيده

[نجم الإبداع]

الله الله

صح لسانك ياماجد

مصافحه مميزه كالعاده

ابدعت ياشاعر

لاهنت

تقبل مروري

وتقدري

[همس الورد]

صح لسانك


و بيض الله وجهك

اخي الكريم

لاهنت

[حي الضمير]

يامـا دفنّـا همّـنـا بالقـوافـي***ويـاما دمحنـا زلـة ٍ مـن عربنـا
مدد صح لساانك يابوحمد
نص مميز من شاعر الروائع

[داعي الشوق]

صح لسانك يا بو حمد

جزل دائما و وافي

سلمت وصح لسانك مدد بلا عدد

تحيتي لك مع التقدير

،،،،،،،،،،

[منيع]

ابداع وتميز
بارك الله فيك
تحياتي وتقديري

[عذب القوافي]

صح لسانك استاذ : ماجد الزيد

نص وافي وهي عوايدك الجزال يالغالي

تقديري ,,,,,,,,,,,,

[زهرة اللوتس]

الشاعر المبدع // ماجد حمد الزيد
سلمت وسلم منطوقك
جزلة من شاعر جزل
لاهنت وبيض الله وجهك
تحياتي
وتقديري

[الـزلـزال]

سلومنا مـن يـوم حنّـا حوافـي=لا عابت الدنيـا فـلا تقـول عبنـا
لو عاب كل الخلـق حنّـا صوافـي=شفنـا غـرب بديارنـا وغتربـنـا

ماجد حمد الزيد


نص شعري راقي ومميز

من شاعر متميز ومتقن وجزل


في نصوصه الشعريه


نسعد ونستمتع بنصوصك الشعريه الراقيه ماجدنا


صح لسانك ملايين ملايين


ولك تحياتي