يا بدر ما تخفـى علـي السواليـف
ياطيـب الرفقـة .. بعيـد الهقـاوي
ادري واعرف ملامس الشلف والشيف
ورفيق الابرق من رقيـق النـداوي
لكن اطوف فاضي الحكـي تطويـف
لين إنهـا تاصـل حـدود اللحـاوي
وليا التفتنا لـه هدمنـا الغطاريـف
بمطـرق يبعـد خفيـف الاهــاوي
كد هيز ياوافي الخصايل وكد عيـف
ملامسـة يحيـر فيهـا الـمـداوي
ليا طب ميدان النفـوس المشاريـف
حطت ووطت مـن كثيـر العـزاوي
والاّ الكمـال لواحـد حـي ومنيـف
ذا الجود والحبل المتيـن الرّهـاوي
محيي النفوس..وخالق المزن والريف
محيي الهشيم اللـي شعيبـه سنـاوي
ما اقول انا عنتر ولا اقول انا ستيف
اقـول وهـاب الوهايـب سمـاوي
لكن ليـا منـي رفعـت المراظيـف
سـم الحنـش وسمهـن امتـسـاوي
وليا ضرب رمحي مدق الشراشيـف
شـال الصفـاق وصلّعـن الكـلاوي
يوم الردي في مذهب الكلب حريـف
يندس..وذي عادت الكلب الشـواوي
يا صلك غافل ويترعرع ليـا شيـف
ويروغ ليا قلت الخـلا يالضـراوي
لكن خله يـا بـدر يركـب الهيـف
يطويك فـي بشتـه وانـا بالعبـاوي
والحر يدري ليش نصبر على الحيف
وش هو مدانـا لابتلاتنـا البـلاوي
ماهي سواليـف الوجيـه المكاسيـف
عشاقـة الميلـة بلـيـا حــراوي
على الرفيق يصلفحـون التصانيـف
ومن الهبـوب يسخـرون الجنـاوي
والضد يـا خذهـا عليهـم مدانيـف
والكـل معطيـه القفـا مـا يـراوي
كنـه مكتـف عـن تحديـه تكتيـف
لكن مـن العانـي يبـون العشـاوي
باصرار وبـرزة خشـوم مشانيـف
وان ذار مالك تنشـده ويـش نـاوي
يضرب بك الغبة ويظهر على السيف
ويطير بك يـم الكواكـب فضـاوي
يصل القمر ويرد فـوق العواصيـف
وانته معه كـن الرياحـي خـلاوي
وليا صرخ باذتـه دوي القواصيـف
راحـت حماريـه وتمـزعّ يـلاوي
من عقب ما هو حاتم الكف ياضيـف
وعنتـر ليـا غيـم نهـارٍ عمـاوي
ويطق با صبع لابن لعبون وحنيـف
وابن ربيعـة .. والحيـاة الخـلاوي
ما علق المنسف ولا علـق السيـف
مثلـه.. ولا غنّـى ولا عبـد راوي
هذا الدليل إنه على قصـر وسخيـف
لكن رايك.. وانـت رايـك كفـاوي
رايـك نسيـر فيـه لقـدام وانقيـف
والنـار نشعلهـا ونحمـي المكـاوي