يا اهْل الونيْت اللي على قاسمَيْنـي
من مصنعه مظهار ضـوْ المكينـة
للي يرُوح يسَـار واللـي يمِينـي
شقرٍ مصادير اللهَب مـن جبينـه
وَقْدِه ليا جا مـع خطـاة البطِينـي
مِبْدار هِمْلـولٍ يجـي فيـه عِيْنـة
أكبر مـن الكيلـو ودون الثنينـي
ومتواطي الفنجـال باقـي جنينـه
سَمْعِي بَاذانيّـه وشوفـي بْعَينـي
يوم إيتقيْعَسْ ثـم يعطـي عرينـه
فات الزريـق وباغتـوه الكمينـي
وامرج عَيَا بين الزريـق وكمينـه
وتناولـوه وعــوَّدوا عايفيـنـي
ما غيـر يقلاهـم مَـرَار الغبينـة
مسراحهم قفْـوِه ضحـانٍ متينـي
ما ياصل اللي بين عَجِّـه وُبَيْنـه
آخر موديـل أول ونيـتٍ ثمينـي
فيمـا يحدُّونـه هَلِـه مرخصينـه
قلنا لهـم حِـدُّو يَبَـا الله يعينـي
من قدَّر الواجـب يبـا الله يعينـه
حَدَّو وعَدَّوا سَلْـم يـا سالمينـي
أبْـرَك نهـارٍ جابكـم جالبيـنـه
لعل مـن صَبِّـه عـوار اليدينـي
ما توجسه يمنـاه عاشـت يمينـه
الله ما هو فـي حاجـة العابدينـي
لا في رجا الكافر .. ولا عابدينـه
الله غنِـيٍ عـن عبـاده يقيـنـي
لكن مثل اللي بَنَى الجمس .. وَيْنه
هذا .. وتم البيـع بَيْنـه وبينـي
والكـل منّـا سيرتـه حاضرينـه
وسَلّمت مفتاحـه مـن المذربينـي
ذيبٍ غرابْ .. وقلب أسَدَّ وعرينـه
عزمه ليا طال المد َى مـا يلينـي
من صًلْب شيبـانٍ لنـا جاذبينـه
حبيب مرسالـي وساعـد يمينـي
عزم ووفا . . ومحَنَّـكٍ عارفينـه
وملفاه ريف الضيف، هَيْف السميني
هَدّاج ما حامـت ظوامـي قطينـه
رمْحٍ مضاريبـه تقـض الوتينـي
عوق الخصيم ليا لَعَبْ بـه قرينـه
جزا ليـا صـار المجـازا يقينـي
يافي ويوفي راعـي الدَّيـن دَيْنِـه
ورِّيْـث عَـوْدٍ رافـق الراحلينـي
ذبَّـوا طريـقٍ كلنـا ضاربيـنـه
صالح عساه برفقـة الصالحينـي
يوم الحساب ويوم كشف الضغينـة
عسـاه بَيْـن حْضَـاه ومقرّبينـي
للهادي المعصـوم راع المديـنـة
ذكَّرتنـي يـا مْوَنّـس الغانمينـي
باسلوب مدخال البيوت الحصينـة
وادراك سـمٍ فـي وُبَـر ياقطينـي
بالغبَّة الخضرا وسقـت السفينـة
من قيل له مثلك مـن الوارثينـي
ما مات يا حـان بعوانيـه حينـه
له ساعةٍ مـن دون رَبْعِـه يبينـي
الضد يـا مسّـه تلاشـىَ يقينـه
إن ادَّعَىَ .. وإن قابـل المدّعِينـي
خصمه يقوم وحجته فـي جرينـه
مثل الجنين وسيـرة أم الجنينـي
يوم اعْرَسوا وِحْسَابهـم حاسبينـه
قضوا شهرهم في ظهور الهجينـي
وزاروك تالـي وقتهـم غانمينـه
وِرْعٍ جبر عظمه علـى المِشّتَيْنـي
واعرس على أمه طامع إنّك تعينـه
وضَرَبت في جلُّود راس الخمينـي
رَدَّيتهـم والـذنـب متقاسميـنـه
أدرك من البيبان بـاب السجينـي
من عندنا باب السجـن مدركينـه
ما اقولها خـوفٍ مـن الذاهبينـي
لومك على اللي ما يكرسع سنينـه
لكـن ذكـرَى تنفـع المومنيـنـي
خَوفي من اللي جنسهـم نافلينـه
لبَّاسَة القرمز .. هـلَ الحلقتينـي
والثالثه فرْق الجمـل عـن قرينـه
اللي لهم روس الرواسـي تلينـي
الله وُخلقـه فعلـهـم خابريـنـه