هذي مجاارة لي مع قصيدة صديقي الشاعر نايف المطيري وهذي قصيدة نايف
يا مرحبا بك يا طلال وياهلا يابـن البـدور=ترحيبة ٍ مقياس ريختـر ماقـوى زلزالهـا
ترحيبة ٍ ماتنتظر مع صفّـة الترحيـب دور=لو رحبوا بك كلّ خلـق الله كفَتـك لحالهـا
جيّتك مثل الشمس منها تستمد الأرض نـور=جيّتك تشبه للذهب واغلـى سعـر مثقالهـا
جيّتك فيها من بخور العود وانفاس الزهـور=جيّتك مثل المزنـه اللـي شاقنـي همّالهـا
ياصاحبي ياللي حضورك مايشابه له حضور=تعجَز توفّيـه القوافـي لـوّ اجيـب ثقالهـا
يامرحبا باللي يمدّ لدعوتـي كـل الجسـور=يالصاحب اللي خوّته عندي تطـول حبالهـا
ياصاحبي ماشفت من خوّتك زلات وقصور=ماشفت غير الطيب ياوجه السعد يبرى لهـا
خوّتك لو هي تنخطب للي يزيدون المهـور=والله لآخذها ولـو تصعَـب علـيّ اموالهـا
مَـانته بحاجة مدح لوّ اكتب ملايين السطور=لأنك من رجال شهَران اللي نعـز رجالهـا
نعم ٍ بك ونعم ٍ بهم بالطيب وافيـن الشبـور=عالين مثل النجمـه اللـي عالـي ٍ منزالهـا
ياصاحبي معزّتك نقشتهـا فـوق الصخـور=ماهي كتابة رمل لا هـبّ الشمالـي شالهـا
هذا كلامي مختصر والقدر يبقى فالصـدور=وقلوبنـا لأصحابنـا دايـم تبـث ارسالهـا
قصيدتي ترحيب لك عنوانها صدق الشعـور=إحساسها صادق معك واسمك يطيّـب فالهـا
وهذي قصيدتي
الله يدوم الك البقا ياللي على العليا صبور=اعـداد هقـوات الرجـال ادقاقهـا واجلالهـا
واعداد من رحب سواتك من زحازيح العصـور=يالشاعر اللي تفتخـر بـك لابتـك واجيالهـا
من بعـد ماجانـي نباكـم لابصـد ولابابـور=لانـي مقـدّر للرجـال اللـي قليـل امثالهـا
وانا اشهد اني قبل اعرفك يالصقر عفت الصقور=اللي تخالف هقوتي في صيدهـا فـي جبالهـا
اعرف عيال البطن يارجال واعيـال الظهـور=واهل بيوت الطيب بيّـن طيبهـا فـي اعيالهـا
يابن الرحيمي والله اني ماسلمت امـن الكسـور=اكسور صحبة ناس بانت لـي خفايـا اعمالهـا
ولاحدٍ جبرها كود خوة من سواك امن النمـور=اللي ليا منها ازنفت يفزع صـدر مـن جالهـا
يا انجال حمـران النواظـر ياسيوفٍ فالنحور=يوم العرب وقت الوغى تحمى حصون احلالهـا
فرسان مافيكم ذليل ولاشرود ولادبور= الارجالٍ فالمواقف بينات افعالها
الامداح يانايف تقافا لك سرى طـول الدهـور=لان النشامـى صيتهـا بيـن العـرب يبقالهـا
ولانسى بدر راعي الجمايل يوم للطالـة سبـور=يسبر علـوم المرجلـة مـن حبهـا ويسعالهـا
سلايل عتيبة تغيـض اللـي نواهـا بالشـرور=تشرب فناجيل العـداء ماحـدٍ شـرب فنجالهـا
امدح رجالٍ ماعليها من مخاطير البحـور=واعرف علوم المرجلة واسعالها وارقالها