هذه المحاورة تجمع بين القوة والطرافة والمتعة بين الشاعرين لويحان الازوري و جميل بن حاسن المطرفي الهذلي:
يقول لويحان :
أنا ماريت مثل هذيل واحد يقرش العيدان=ليا جار الدهر قاموا على اليابس يحطبونه
وهم ماهم فقارا عندهم معزا وبل وضان=عساهم بالزمان اللي يجيهم رافع قرونه
جميل:
تمدّح يا عميل الخير وأنته قاصر الجنحان=ليا ماأصبح مديد البدو ضوّك ما تشبونه
تحمد لربي اللي حت منك القمل والصيبان=بعد ظلا يسيّر في علو الثوب وردونه
لويحان:
عسى ربي يجينا بالمطر من رايح الامزان=على نجد العذا اللي مايجيها منتقل شونه
ديار المرجله ماهي كما ديرتك يا الفقران=وأهلها يركبون الخيل والعايل يضدّونه
جميل :
ليا جاك المطر سالت ضواحي نجد والشعبان=وقمتوا تقنصون الفار والضفدع تصيدونه
وحشت الورع والحرمه تلم الفقع فالزبلان=على المرقوق يا لويحان لضيوفك تحطونه
لويحان:
أنا ماني سواتك يا جميل أبقنص الوبران=ليا منّه جحر فالغار عودتوا تحفرونه
واناثيكم يبيعون اللبن والغزل واليدمان=وتشري به من الابطح وليتك جزت من دونه
جميل :
ترى بيع اليدام اشرف من اللي يخرز الحذيان=يخرز الصمط من داخل ويجر السير بسنونه
ترى بعض الصنايع يا عميلي دونها التركان=كما اللي يشرب الدخان وأهل العلم ينهونه
لويحان:
تراني مستحي من شيخكم واللي حضر ماهان=لكنك يا ولد حاسن تجر الشوك بغصونه
اشوفك ياجميل مجوّد الخوصه كما السرقان=وثوبك ثوب قوماني وبه ناسٍ يعرفونه
جميل:
كلامك زين وانته زين يا مطيبك يا لويحان=لكنك يا عميل الخير تنظر كاحل عيونه
أنا ماني سواتك فالقرايا تنقز الحيطان=ليا صاحوا عليك انحشت وأهل الغرب يوكونه
لويحان:
أنا داخل على الله من كلام الزور والبهتان=نباها طيّبه والصبح كلٍ راح في شطونه
أنا شايب واحب اللعب يا حاسن مع الشيبان=لكنك ليش ترسل فوقي اللي ينفض جنونه
جميل:
أنا عمي وعمك خادم للملك والسلطان=وابوي ابوي لامني حضرت اسد من دونه
ليا منك عدلت يجيك مني عدل في الميزان=ليا عمت البحر تلقى رياجيل يعومونه
لويحان:
كمنك يا ولد حاسن قعدت الدرب في يدعان=لمن هو حج بيت الله وربك ما تخافونه
ترى السارق ليا منه سرق يصلب على العمدان=يجره خادم ابن سعود والعسكر يدفونه
جميل:
قعدت الدرب يوم انك تبات مع المره طيّان=واخذت ريال جمرك فوقكم وانتم تخبرونه
ومولانا جمعنا لين سرنا كل ابونا اخوان=وطاك اللي وطاني والله اعطى الحكم مامونه
لويحان :
علامك ما نطحت البارق اللي جاء مع الريعان=علامك ما نطحت البارق المفتن تحربونه
عطيتوا ضلع كبكب تنقلون الزاد والورعان=تبون الجيّد اللي كان اهاليكم يعبدونه
جميل :
علامك ما حربت الباشه اللي قبله العثمان=يسيّر في عنيزه تنكره ولا تقرّونه
نصيحه لا تعرّض لاأمر من هو كل يون بشان=وحنا ما عبدنا غير معبود تعبدونه