للشاعر محمد جارالله السهلي
تدور الارض وتدور السوالـف والسنيـن تـدور =وانا لو أعرف اللي راح ماني بـعـرف الباقـي
يقولون القصيد شعور .. والشاعر بـدون شعـور =واقـول الله يعاقبنـي اذا ماهـو مـن اعماقـي
أنا لو أكذب بشعري وقف نبض ويبـس حنجـور =وقادر أخسـر الدنيـا .. عاجـز أخسـر أخلاقـي
ولاجل عنق المها والصوت الأدفى والعيون الحور =وقف عمري ولا أدري ويش أنا من وقفته لاقـي
قسـم بالله ماقبلـك غيـاب ولا بعـدك حظـور =لكـن ودي بفرقـاك لـو مــاودك فـراقـي
تعاتبنا بما فيـه الكفايـه مـن ثمـان شهـور =وسالت دمعتين وطاح قلـب وماتـت اشواقـي
تعدتـك المشاريـه وجفـاك اللـوم والمستـور =اذا ما يكشفه صوتـي كشفـه الحبـر بأوراقـي
تعبت أضحك على نفسي وأبرر لك وأعيش الدور =وتعبت أجامل ظروفك وأصـدق كذبـك الراقـي
يكفيني أغيب وخافقـي ماجـاك منـه قصـور =ويكفيـك أتذكـر كـل ليلـة لهفـة اعنـاقـي
تذكر يـوم أخليـك اتباههـا كبريـاء وغـرور =يوم اني أتحـدى بـك وأخيـب هقـوة الهاقـي
وتذكر يوم أعذرك وانـت لاصـادق ولا معـذور =أدور لـك عـذر وأصدقـه وأكـذب أحـداقـي
وتذكر يوم جيت من الحزن متضايـق ومكسـور =فرشت لك الضلوع وقلت لـك ياسيـد عشاقـي
خذ ضلوعي وابن فيها يسار الصدر بيت وسـور =ترى مافيه قبلك من سكـن صـدري وخفاقـي
وبعد هذا رحلـت ولا بقـى الا بيتـك المهجـور =ولا ياكبرها اليا من رحلت ومنزلـك باقـي