بيني وبين خالي/الشاعر سليم خضر المطره العميري
ياراكـب اللـي زاهيـا بـالاشـده =عليه من قـش الحميـدات معـلاق
سنه ربـاع وافـي الخمـس عـده =مثل السحاب ان صار يمطر وبراق
يلفي على العمـران ربـع المسـده=مفطرين الضيف مع فـك الاريـاق
تلقـى فراشـه زل فوقـه مـخـده=ومعشرق الفنجـال كـادم غرنـاق
يرموا جزيل الضان والضيف قـده=تشبع يمين الضيف من قبل مـالاق
يانايـف المقـبـول أسـألـك رده=يسألك خالك وانت بالـرد مشتـاق
ابسألك عـن سيـف يازيـن حـده=والسيف الارخم لأسود الراس حلاق
وابسألك عن شيـخ دوبـك تشـده=دايم مريض وكـل علـه بدريـاق
مـر الطبيـب ويمـه الشيـخ وده=يمكن يطيب الشيخ ينجح من الـداق
بيت انبنى (ع) الساس محـد يهـده=لو البحر زالتيـه تمشيـه بالسـاق
نسمع يقول عنيز مـن قبـل مـده=يالله تلعـن دار زي دار بـرشـاق
واسمع كلام الخال واحرص تـرده=واكتب كلام الخال في بيض الاوراق
ردي عليه/
يامرحبـا بالخـط واللـي يـعـده=وحيـاك ياخـال تولـع ومشتـاق
حيك عدد ماهيجنوا علـى الاشـده=واعـداد مابـن تسويـه ويسـاق
واعـداد مايلقـى مــود مــوده=واعداد ماتلقى عن الضيق مـدراق
قــم يانديـبـي ماكتبـنـاه وده=يم المطيري مع تحيـات واشـواق
اركب على اللي مشيتـه مجرهده=سابق ومع طول المسافـات لحـاق
حـر عليـه مـن الدناديـش قـده=ومنين ماسقته على يديـك ينسـاق
كنـه الشيهـان يـومـك تـهـده=دلجه وثيق وكل ساق علـى سـاق
يوصلك للي تقـري الضيـف يـده=في ديرة يشرح بها الصدر لاضاق
فـي ديـرة بربوعهـا مستـبـده=عسى السحايب تعتمدهـا وتنسـاق
تلقى الـذي بالطيـب دايـم نعـده=قلـه علمنـا للعزيزيـن خـفـاق
قلـه بيوتـي تـوهـا مستـجـده=وحلل المعنى علـى كيـف مـالاق
الطيـب سيـف والنشامـا تحـده=بين الرجال اللـي يسنـوه بـراق
وسيف الردى لاعـاد منـه يشـده=مسـود للـراس ارخـم وبــواق
والحـض سيـور الليالـي تـرده=لابـد تلقـى لـه بديـل ومنتـاق
نمشي مع ضروف الزمن دون عده=برد وملابسنـا خفيفـات ورقـاق
احد جفـاه الضيـق واحـد يحـده=واحد ضرير من العاويـس مافـاق
معلـوم بيـت العـز محـد يهـده=لاصار سيسانـه قويـات ووثـاق
ارمي على اللي ضامري يستـوده=معنى وهو يرمي على شوف وحقاق
واللـي نعرفـه للمطيـري نعـده=ونحفضه داخـل دواويـن ووراق
وسلامتكم000