نسيتي لأحمد الناصر الأحمد
نسيتي المـزح بالقبـة=ونسيتي لعبنـا الطبـة
نسيتي كشختـي دايـم=بثوب دوبلين اخبخب به
نسيتي غتـرة الملمـل=تغطينـي تقـل جبـة
نسيتي الركض بالطاية=لاصـار بدارنـا شبـة
لاجابوا فضلة القرصان=نتسابـق ودنـا نلبـه
نسيتي إزعاجنـا لمـك=وهي بالحوش منكبـة
نسيتي معلف ام العوف=تصفينـه وانـا اكبـه
نسيتي ثوبـك التنتـر=وغيظك لأنقطـع حبـه
لاجابت امك الوازليـن=نهج للحوش ما نحبـه
تبـي تدهـن قوايمنـا=وحنا نهـوش ونسبـه
نسيتي بسطـة عزيـز=ايلاجاء العصر بالقبـه
نسيتي القربـة الشنـه=وماهـا البـارد نقبـه
نسيتي قولك معصقـل=وانـا اعيـرك يالدبـه
نسيتي نعالنـا التليـك=هي الموتر ونلعب بـه
نسيتي من كثر ركضك=انـا مسميـك بالدبـة
نسيتي موعـد الحنـا=ايلا جاء صابكن خبـه
نسيتي طيحتك بالليـل=وهي ظلماء وانا السبه
نسيتي اكلنـا الهبـود=نتناقر والسبـب حبـه
وامــك لاتهاوشـنـا=وتحط بعيوننـا شبـه
نسيتي ثوبـك الكرتـه=ننكـت فيـة ونشبـه
نسيتـي كحـة المـذن=قبل يـذن يبـي ينبـه
نسيتي تريكنا المصنق=نغسلة قبل مـا نشبـه
وندعى الله كود العنـز=تجيب وليد نلعـب بـه
نسيتي كيف اوصف لك=زمـان يعلمـه ربــه
حلو رغم الفقر بالحيـل=زمـان راح ونحـبـه
لك الفديو لـك التلفـاز=لك المكياج مـا احبـه
لك الدنيـا وزخارفهـا=وعطيني حظار مع قربه
ومعهن مسفـع بالـي=وثوب اللا س والطبـه