ع.الثويني
القصيدة رقم (31)
سكون الليل
سكون الليل والضلما هدوء الكون والكتمان = حروف العشق والذكرى وحبري وصحوة احساسي
عناويني اذا حسيـت مالي بالزمـن عنـوان = واذا جـافيتـها تزعل تقـول اكـرهك يـا قـاسي
سكون الليل يزعجني سواده يجذب الاحزان=هدو الكون يجبرني أبعثر دافي انفاسي
وكتماني يزيد الجرح يجبرني على النـدمان = لو اني ما عرفت اندم على ما فات واحتاسي
حروف العشق لا بده تصحي غافي الوجدان = ودمع العين لا بـده يجي ويذٌكر النـاسي
يخط الحبر مابه صبر ويذكر كل ما قد كان = وبعده يصحي احساسي ومصعب صحوة احساسي
وتبدا ليلتي بذكرى ويمكن تنتهي بنسيان = واذا شفت الفضاء شرف يهاجر كل هوجاسي
ــــــــــــــــــــــــــــــ ــــــــــــــــــــــــــــــ ــــــــــــــــــــــــــــــ ـــــــــــــ
القصيدة رقم (32)
من مد لي يمناه
بسم الولي يبدا .. بقافي لساني=الخالق ، الجبـٌار ،، ربٌي ومولاي
أترجم اللي صار لي في زماني = أفراح .. ولا ضيق همـٌي وبلواي
هوآي ترتيب الحـِكم والمعاني = قطف الثمار اليانعه ، صُلـب مغزاي
وإن شفت شوقي با المحبه ضناني=ناديت للي شاقني وسط مغناي
أسج وانسج من حروفي أغاني=والصمت في بعض المواقيف مبداي
ما ذل نفسي في سبيل الأماني=للواحد الباري .. همومي ومشكاي
واللي يدورني ... أنا في مكاني= ما أتبٌع المقفي .. ولا أهمٌل الجاي
هرج العواذل مايزعزع كياني=هرج العواذل موقعه .. حدر ماطاي
أبعد عن اللي في طباعه أناني=ممشاه والله ماغدا .. نفس ممشاي
الخاين اللي با الخيانه نواني=أسهـل عليٌ فرقاه من شربت الماي
أسقي شراب المر للي سقاني=لا زاد بي همـٌي .. ولا عاق مسراي
واللي يقدٌر خوٌتي .. ماشكاني=من مـد لي يمناه .. مامـد يسراي
أقدٌره وأفز . لامن نخاني=ذاك الذي قربه مرامي وسلواي
والحمد للمعبود .. يومه عطاني=بعض الدروس .. اللي فهمته بدنياي
ــــــــــــــــــــــــــــــ ــــــــــــــــــــــــــــــ ــــــــــــــــــــــــــــــ ــــ
القصيدة رقم (33)
في بحور الحب تايه مركبي
في بحور الحب تايـه مركبـي=دون وجهه والعواصف تتعبـه
قلت يادمع المحاجير ،أسكبي=ذي دروب الحب دايم مرعبـه
يادموع العين سيري واكتبـي=قصتي ، واملي صحاف المكتبه
مل.. قلبي كثر توصيف الضبي=ماتحقق حلـم قلبـي ومطلبـه
إنحني ياشمس حلمي واغربي=دام قلبي مالقى مـن يطربـه
كل ما حاولت أحقـق مطلبـي=تخطف الايام حلمـي وتسلبـه
يازمان الضيم قلٌي ،/ وش تبي=وش بقا فيني مكاسب تكسبـه
ــــــــــــــــــــــــــــــ ــــــــــــــــــــــــــــــ ــــــــــــــــــــــــــــــ ـ
مبروك بن ماضي
القصيدة رقم (34)
سنوات الضياع
من ستة أشهر أو سنه وسوال في عقلي يدور = وش هالتعلق بالفنون الفاسده والانصياع !
واريد ردّ إمْنَ الذي قاعد يتابعهم شهور = هل من مشاهدْتَ الدراما فائده أو إنتفاع
ما كل من (مثّل)0وسجّل وسط شاشتنا حضور= نقبل سخافاته ونعجب فيه من دون إمتناع
الغير لو قدم لنا قصة عِشْق(عنزه) (وثور)= ابهر بها جُهالنا : في مثل ( سنوات الضياع )!!
مسلسلٍ يعزف على اوتار المشاعر والشعور= يخاطب أفكار النشئ ويتابعونه بإندفاع
وآخر يسمى (نور) واشهد ان مافي نور/ نور = كم بنت باسبابه غوت0ايضاً وكم من شاب صاع
إليا متى نجري ورى صرعت ثقافات القشور = ويعيش جُل أجيالنا في أزمة أخلاق وصراع
لابد مانبحث عن اسباب التحول/ والقصور = اللي حصل من اجل نوصل في النهاية لـ إقتناع
لو نسأل الشبان مثلاً عن قضية (دارفور) = كان إسلونا وين هالمشكل وفي أي البقاع!!
لكن لو تسأل عن الموضه وعن شركة ديور = تلقى الكثير اللي عرف، ومن بضاعتها ابتاع
عوامل التغريب عملت في ثقافتنا بثور= وغطت الوجه الحقيقي للأصاله بالقناع
وآقول طوبى ثم طوبى للعذارى في الخدور= اللي يحاول جرهن الاعلام 0لكن ماستطاع
والعز والرفعه وكل المجد للشاب الغيور= المحترم الملتزم اللي عبد ربه وطاع
من هو (مهند)لجل تُعجب به مره 0 جعله يغور = من هي (لميس) اللي بها كم من صبي أُعجب وماع
مامن وراهم غير جلب السؤ وتصدير الشرور= باسبابهم قل الحياء في من يقلدهم وشاع
وماتت الغيره سبب أهل التفسخ والفجور= اللي يرون ان المره في عرفهم سقط المتاع
وش نرتجي من شاب مايع غير تعقيد الامور= كل من تشبه به من الشبان ضل عقله وضاع
عز الله إن ْ ماهو هوى الخفرات من ضُمرْ الخصور = اللي مايلتفتن الى مثله من الناس الرعاع
الطيّبه تلقى لها طيب 0 وكل شينه تبور= مهما الخبيثين انبروا عنها جميعاً بالدفاع
يالمسلم اللي دايماً0طبعك على اهلك غيور = لاتترك ابناءك مابين (كـ 00) وذيابٍ جياع
ــــــــــــــــــــــــــــــ ــــــــــــــــــــــــــــــ ــــــــــــــــــــــــــــــ ـــــــــــــــــــــــ
القصيدة رقم (35)
جزمة منتظر
في سبق صحفي لافت لكل لأنظار = تحدثت باسم العروبه جزمها
فرده تـبي تأخـذ من المجـرم الـثـار = واخرى تعبر عن مشاعر المها
لولاه دنق ثـم حنى جسمه يسار = كانه على الوجه القبيح استلمها
لكنها لاشك صابته بالعار= وتحدت امريكا وهزت علمها
والكل شاف اللي عـلى التلفزه صار = توديع غازي للحقايب حزمها
تسلم يمين المنتظر حامي الدار = وانعم بجزمه ثائره نحترمها
وصلت الى عشره ملايين دولار= ويقول لا عطها ثمنها وسمها
بسطار غالي حطم ارقام الاسعار = لانه رعب جورج ونفسه هزمها
وياليته ألا خلف بوجهه آثار = وابرد كبود نفوس حره ظلمها
شن الحرب على العرب سر وجهار= وياكم وكم روحٍ بريه اعدمها
جاروقسى رمّل نساء يتم صغار = دنس بيوت المسلمين وهدمها
خاب وخسر انه يظن يقتل إكبار = امة أبيه تفتخر في قيمها
ــــــــــــــــــــــــــــــ ــــــــــــــــــــــــــــــ ــــــــــــــــــــــــــــــ ــــــــ
القصيدة رقم (36)
ياربيبه
قلت الغلا: قالـت هـلا سـم لبيـه =معهـا خذتنـي للامـل والامـانـي
وشعرت كني صايـرٍ ياعـرب بيـه =وش بيه! بل سلطان حاكم زمانـي
وأزريت اجد من فيض الإحساس تشبيه =حيث انّه اكبر مـن بلاغـه بيانـي
صارحتها: قلت أغبط اللـي تحبيـه =يابخت منَ لَه وسط قلبـك مكانـي
قالت وهل :أخفي غرامي وأ خبيه =غيرك فلا يسكـن بهالقلـب ثانـي
قلت اصدقيني القول قالت (ياربيييه)! :)=مبروك منّك يووووووه !! وش كثر أعاني
انا عطيتك عهد وش لون أخل بيه! =واعلنت حبي لك ، لقاصـي ودانـي
قلـت آمـري وش تطلبينـه ألبيـه =نذرت عمري فـي غـرام الغوانـي
قالت طلبتك هاجـس الشـك مابيـه =أشعر واحسْ إنِّـه يزلـزل كيانـي
أقـول هـذا لـك ميانـه وتـنـبـيـه =واللي على قلبـي يقولـه لسانـي
قلت اسلمي 0صبي لي الحكـي صبيـه =في مسمعي 0يصبح كلامك أغانـي
من غيرك احلم به واحبه وآحابيـه =وآ عامله باللطـف هـو والحنانـي
تقولين يا لـبيـه وآقـووول لبيـه =وآ سكِّّنك فالقلـب بيـن المحانـي
ــــــــــــــــــــــــــــــ ــــــــــــــــــــــــــــــ ــــــــــــــــــــــــــــــ ــــــــــــ
مروان الشيخ
القصيدة رقم (37)
صوفيا
اذا مل الورق صمت الرفوفي=اقمت المولد وصفت صفوفي
مريد فحضره الشعر الحقيقي=طريقي لو تحدتني ظروفي
على آثار اقدام المعاني=بواصل رحلتي بايمان صوفي
اويسى اختصر امسي بحرفي=وتمسك اصبع الماضي كفوفي
اعيش الشعر حالة وجد عاشق=طرب لين ابتدا هز الكتوفي
ولا مني سمعت القاف اطرب=وتبحر في طواريقه حروفي
بادور وبانسجم واعيش حاله=ليا منه بدا ضرب الدفوفي
انا بيت الشعر والشعر بيتي=احل بداخله ويحل جوفي
ولو يطلب هجوس الشعر ماقف=وقفته لو يطول ابها وقوفي
انا في ساحة الشعار فارس=خفوقي غمد وابياتي سيوفي
وردت البير من صافي قراحه=شربت الجزل واسقيت الهنوفي
وشمس الشعر لامن غبت تكسف =واذا غاب الشعر بأعلن كسوفي
ربطني صدر من بيت بقصيده=وصرت اهيم به بصري وكوفي
(اذا كان الزمن صافي تعلل)=تبدد من بعد هالشطر خوفي
وصار الصمت باوراقي قصيده=وصفت يوم مولدها صفوفي
ــــــــــــــــــــــــــــــ ــــــــــــــــــــــــــــــ ــــــــــــــــــــــــــــــ ــــــــــــــــــــــــ
القصيدة رقم (38)
ضميري في وطن جسمي
رحلت لداخل اعماقي أفتش عن بقايا انسان=فقدته في خريفٍ جفف البستان بايّامي
أدوّر في زوايا الذاكره نقشٍ على الجدران=دليل يعيد لاحلامي بقايا انسان باحلامي
أنا اللي سنين متغرّب بدنيا التيه والنسيان=وصل سيل الملل حدّ الضياع وموطن الآمي
ضميري في وطن جسمي مشرّد ما لقي عنوان=ينام بأرصفة جمري ويتغطى بـأوهامي
شربت الملح باحداقي وصلت لحالة الإدمان=لأني كل ما أشرب بحر بالذاكره ضامي
حروف من الشتا تكتب خريف العمر بالنكران=وأنا لو بالأمل باكتب حياتي جفت اقلامي
تعبت اشكي وانا صوتي صداه بعالم الالحان=يعيش الناي في عزف الوداع ودمعه الدامي
أبي أخلع عن الدنيا ثياب الهم والاحزان=والبّسْها بنور الشمس واكتبها بمرسامي
وأحدد في ملامحها بقايا من أمل انسان=رحل يبحث عن ورود الربيع فحقل الالغامي
رجعت وما لقيت الا نقوش تحيّر الحيران=فتات لخبز ايام السلام وريحة الهامي
ــــــــــــــــــــــــــــــ ــــــــــــــــــــــــــــــ ــــــــــــــــــــــــــــــ ــــــــــــــــــــ
القصيده رقم (39)
مرتاح ولا
دنياي صحرا وكانت روحك الواحه=تروي عروقي وتسقي بالهوى روحي
عامين وانته قفل قلبي ومفتاحه=عامين ابني على آمالك صروحي
هدّيت عمري وعمر الطير بجناحه=قصّيت ريشي.. كسرت بغدرك طموحي
مجروح قلبي وصعب اداوي جراحه=شيّعت حبي بعد ما مات مذبوحي
ما احس راحه وكيف ألاقي الراحه=وذكرى غرامك حمامه ملّت النوحي
مابيك ابعد كرهت الحب ورياحه=مليت صمتي ومل الصمت من بوحي
لا عاد تسأل بروح وبترك الساحه=وانته بكيفك بعد ما اروح مسموحي
احس روحي بعد فرقاك مرتاحه=صكيت بابٍ فوجه الريح مفتوحي
ــــــــــــــــــــــــــــــ ــــــــــــــــــــــــــــــ ــــــــــــــــــــــــــــــ ـــ
موج القصيد
القصيدة رقم (40)
يابوي
يا بوي يا مرجع هل الجود والطيب=يا صانع المعروف بهل الجمايل
ابوك من نسل الرجال الغواليب=وخالك عريب الجد واف الشمايل
سبحان من نزه وصوفك عن العيب=وعطاك من حسن الوصوف الفضايل
يا صقر يسكن فوق روس المراقيب=متعليٍ يرقى على كل طايل
يا عزوتي لا عدوا اهل المواجيب=يا مسقي العطشى بدهر ومحايل
يامعزب اللي ما لقى له معازيب=يلقى عقب حر الشموس الضلايل
ولا جتك حرمه تنتخي فيك يا الذيب=تستر بستر الله سود الجدايل
ويوم ان نخاك المبتلى بالمكاتيب=ويقول شاف من الزمان الهوايل
ما اخذك في شكواه شكٍ ولاريب=واصبحت له مثل السحاب الوبايل
يا نصر من صكت عليه الكلاليب=وجارو عليه اهل القلوب الغلايل
اعتقت نفسه من يدين المطاليب=بالمال والمبنى وحمر الاصايل
لك في دروب العز مجدٍ وتوجيب=تارد حياض الموت من دون حايل
ولا ثارت الهيجاء ركبت المراكيب=ورديت حقك بالسيوف السلايل
ولا جو جنودك يجمعون المكاسيب=مكسبك عند الناس طيب الفعايل
يابوي من بعدك بقلبي لواهيب=كن الخفوق بوسط حمر الملايل
الفكر معك وما لقى عنك تجنيب=والقدر مايبغى شهود ودلايل
يا بوي لا تبطي جروحي معاطيب=يا بوي بعدك حالي اليوم مايل
ابسألك يا الله يا عالم الغيب=تحفظ كريم الاصل واف الخصايل
ــــــــــــــــــــــــــــــ ــــــــــــــــــــــــــــــ ــــــــــــــــــــــــــــــ ـــــــ
القصيدة رقم (41)
احبك ياهوى قلب الجريح
احبك يا هوى قلبي الجريح وحبكم فتاك = احبك يا بعد قلبي وروحي وكل غاياتي
احبك من هنا لبكرى لاخر عمرنا لهناك = احبك يا هنا عمري وكلي يا بعد ذاتي
احبك لو بعدت ورحت لا يمكن ابد انساك= احبك كثر اهات البعاد وكثر دمعاتي
احبك يا بعد قلبٍ يموت ويندفن لرضاك = احبك والله لو تعرف بحبي تسعى لرضاتي
احبك واعترف اني فقدتك يوم عفت حماك = احبك وانت تعرفني ابد مابعد بخطواتي
احبك واعترف اني احبك واشتري شرواك = احبك لو يطول ابعادنا ويطول اسكاتي
احبك واشتري لحظه اهيم بها معِ ذكراك = احبك لو عجز حرفي يعبر عن معاناتي
احبك والهموم اللي غزتني جات لك تنخاك= احبك واعترف اني اكرر دوم زلاتي
احبك والجراح اللي بقلبي طبها يمناك = احبك داو لي جرحي ولو طبه بكياتي
احبك خل عنك الصد يا غالي عساي فداك = احبك وانت تعرف عن غلاك وزود لهفاتي
احبك والدماء اللي بعرقي كلها تهواك = = احبك لو بعدت اموت من همي وحسراتي
احبك واعترف اني ابد ما اقدر على فرقاك = احبك جاك حكيي والقصيد وجاتك ابياتي
ــــــــــــــــــــــــــــــ ــــــــــــــــــــــــــــــ ــــــــــــــــــــــــــــــ ـــــــــــــــــــــــــــ
القصيدة رقم (42)
اهديت لك
اهديت له ورده من الحب حمرا = وقلت العروق اللي بقلبي ينادون
لي كل ليله مع حراويك مسرا = يعقبه صبحٍ باصدق الحب مقرون
يا فل يا ريحان يا ضي بدرا = ياللي له ابقلبي غلا حيل مصيون
بالقلب من حبك وقيدٍ وجمرا = من يطفي النيران قلي وبالهون
غلاك ليّن قلبي اليوم قسرا = حبٍ له اعروق المعنى يلبون
اغليك ياللي دوم ع البال تطرا = يا غاليٍ حبه جليٍ ومأمون
نفحت غرامك ع العشاشيق اطرا = من ماي هتانٍ تّهْمل به امزون
وادموع عيني من سبايبك حدرا = دمعٍ سبايب شوق ساطي ومجنون
عُسر الليالي معك ذا اليوم يسرا = اسعدت قلبٍ كان مبلي ومحزون
زرعت لك في داخل القلب بذرا = بِذرة غلا تنبت بساتين وغصون
وفوق الغصن قُمري يغني ويقرا = بيوت شعرٍ بعذب اوزان ولحون
انت بغلاي اليوم فاهم وادرا = تدري باني فيك ذايب ومفتون
عذرا عن التقصير باللهِ عذرا = عجزت بيوت الشعر بالوصف يوفون
ــــــــــــــــــــــــــــــ ــــــــــــــــــــــــــــــ ــــــــــــــــــــــــــــــ ـــــــــــــ
صوت الإحساس
القصيدة رقم (43)
من صوت الإحساس
أشوف كل (ن) غدا همّه على قدّه = واشوف همّي يزيد ومقصده هدّي
البعض يشكي اذا صار الزمن ضدّه = وانا حبيبي وناسي والزمن ضدّي
ولوهي على كيف همّي طحت من مدّه = لكن شموخي ورثته ورث عن جدّي
ماهمني يوم قالو ذاك وش حدّه = مايدرو اني بحزني واصل (ن) حدّي
قالو علامه يطيع القلب ما صدّه = وشلون اصدّه وهو ما قد نوى صدّي
اكتب مشاعر خفوقي مثل ما ودّه = ويجيبها كل مرّه مثل ما ودّي
لو كان قصدي يهون و ينفضح سدّه = هلّيت دمع (ن) حبسته وانفضح سدّي
ما قصدي الا يبان الصدق في ردّه = ماهي قصيده بليلة شعر وتعدّي
من صوت الاحساس حرفي مدّته مدّه = لا جابها جاب شعر(ن) حيل متعدّي
جا يشبه السيف لامنّه لمع حدّه = أومثل قطرة مطر طاحت على خدّي
والشعر بالأصل لو ما مدّ لي يدّه = ما جيت يمّه ولا مدّيت له يدّي
ــــــــــــــــــــــــــــــ ــــــــــــــــــــــــــــــ ــــــــــــــــــــــــــــــ ــــــــــــــ
القصيدة رقم (44)
غيروك
طيبتي ماهي غبا والا سذاجه = كنّهم بعدي حبيبي غيّروك
والمحبّه من طرف واحد سماجه = وانت لو حبّيت منّي ما خذوك
حس في منهو تعنّا لك وناجه = لا تراود خاطرك فيه الشكوك
ليت قلبي ما صرخ لي فيك حاجه = وليت ثوّار الغلى ما طاوعوك
لين صار بغيبتك مثل الزجاجه = ينكسر من حسرته لامن طروك
علّته بعدك وفي قربك علاجه = دوك شريانه يسولف فيك دوك
وان نهرته عنك يزداد احتجاجه = وانت جند اشواق قلبك ماعصوك
ذاب من شوقه ولا حصّل خراجه = وليتهم لامات لهفه ينفعوك
ليه ترضى فيه ياسرّ ابتهاجه = وليه ودّك يحرموه ويحرمووك
ــــــــــــــــــــــــــــــ ــــــــــــــــــــــــــــــ ــــــــــــــــــــــــــــــ ــــ
القصيدة رقم (45)
وقف
أسألك بالله وقّف لا تروح = لا تخلّيني لهمّي والعذاب
لا تخلّيني كذا من غير روح = لَنْ روحي موتها طاري الغياب
كيف تتركني مع وقت(ن) شحوح = الأماني فيه من غيرك سراب
وكيف تجرح قلب شيّدلك صروح = وكيف يذبحني العطش وانت السحاب
إنت سلوة خاطري وانت الطموح = وانت فرحة قلبي اللي فيك ذاب
وانت لـ حساسي ملاذ من الجروح = وانت في رحلة معاناتي زهاب
شوفني والسالفه ضحك ومزوح = أختلف لوني وفارقت الصواب
ابتسم لكن من اعماقي أنووووح = كِلّ خوفي تجرحك نظرة عتاب
كيف قلبك طاوعك فيها تبوح = لِعن بو مزح(ن) يجيب الإكتئاب
لا تكرّرها وانا قلبي سموح = قُلْ لساني قالها مرّه وتاااااااب
ــــــــــــــــــــــــــــــ ــــــــــــــــــــــــــــــ ــــــــــــــــــــــــــــــ ــــــــــــــــ
سناعيس
القصيدة رقم (46)
الفطاحل
سلام الله عليكم يالفطاحل ياهل الطولات=سلام مايليق الا بكم يا أهل الصخا والجود
هلا يامرحبا بالكل وهذي أبرك الساعات=بكم تزهى مواقعنا ولكم منا الشكر ممدود
هلا يامرحبا من موقع أحيا زمان فات=تحية شعر ودروس تذكرنا بتراث جدود
ألا يازين جمعتكم عليها نردد الآيات=وعسى عين الحسود صبيها يعمى وفيها عود
ومدام مميل عقاله ملكنا وأبيض النيات=أنا أشهد ماعلينا خوف ولا زال الأمل معقود
أبو متعب الى منه حكى يفعل وله وقفات=لشعبه بلسم شافي وللأعداء فيه سم كبود
قطع دابر طواعين الشرور اللي بها هفوات=وفئات للظلال المنحرف واللي تقوده قود
وعسى يدين الغدر عنا تكف الشر والسيات=وعسى الله يقطع الإرهاب ويقطع دابر النمرود
وعسى من يلعب بأسهم عباد الله للحسرات=ويجيه من السما ماحق وساحق والكسب مردود
ويفيق اللي قضى وقته تعيس يتابع الشاشات=ومؤشر طالع نازل معه تجي الخساير زود
ويزيد المشكله بنك يسهل للبشر شيكات=ويغر الناس بأرباح خياليه بدون اشهود
ويلا منه خذا القسمه ولاهي نكبة النكبات=طلع خسران راس المال وتمويله طلع مقصود
نبي صرفه لها الأسعار نبي دبره لها الآفات=ونبي كل السلع تنزل لها المستهلك المقرود
وأملنا يازبون الطيب في كفك يابو النخوات=تحل المشكله والمعضله لانك حفيد سعود
نبي نعيش بكرامتنا نبي الفرحه لنا عادات=نبي نطوي سنين بالجهل كانت تقيم سدود
نبي نجني ثمار انغرس فينا علي شتلات=ونبي ناخذ تطورنا مع العالم بكل ركود
وصلاة الله على من يشفع لخلقه عن الزلات=عدد مالبحر والبر وعدد مابالعدد معدود
ــــــــــــــــــــــــــــــ ــــــــــــــــــــــــــــــ ــــــــــــــــــــــــــــــ ــــــــــــــــــــــــــــ
القصيدة رقم (47)
عوج الضلوع
عوج الضلوع اللي حدبها لك بويت=تستاهلينه دامك أحلى عشيقه
وان كان ماكفاك خوذي حتاحيت=قلبٍ على لاماك ماعدت أطيقه
لا يابعد كل الملا الحي والميت=ولا يابعد كل الأمم والخليقه
انتي وأنا مثلك أعيش وتربيت=على أننا دايم نقول الحقيقه
انتي معي ان رحت والا بعد جيت=لاتحسبين اني نسيتك دقيقه
ياورد ياجوري أنا بك تغنيت= لأنك لشعري شذاه ورحيقه
إن كان ظنك ياهوى البال كبيت= كاس الغرام اللي تلامع بريقه
لا لا وربي فارض الحج للبيت= انك بقلبي والسويداء وثيقه
أنا أعترفت اني على طول طبيت=في بحرك اللي يفتخر في غريقه
وودعت نفسي فيك ايضا وسريت=لك يامنى عيني بذات الطريقه
فما فيه داعي للحسايف ولا ليت=لاصار حبي لك جذوره عميقه
ــــــــــــــــــــــــــــــ ــــــــــــــــــــــــــــــ ــــــــــــــــــــــــــــــ ــ
القصيدة رقم (48)
لله در العمر
ياوقتي اللي ماخدمني ولا يوم=لله در العمر ياطول صبره
ماني على بيض الدفاتر بمليوم= لامن نثرت من القلم كل حبره
من شان اخفف حيرتي شي معلوم=اهيض اللي كاتم فيّ عبره
ياللأسف عانيت من ماجرى دوم=ولا استفدت من العنا زود خبره
اصبر وأحس اني على طول محروم=يالله دخيلك كانها قل دبره
من يشتري قلبي ومن يفرق السوم=أنا بابيعه لو قطع منه هبره
عجزت اعاني من هموم غدت كوم=غرقان فيها والحمل زاد كبره
ياحظي اللي دايما وانت مهزوم=ولا يتعدى حجمك لراس الابره
كني غريق ويسمع بطاري العوم=طب بمحيط ويغرقه نصف شبره
اشكي عليك الحال ياوقت ملزوم=وانت الكفيل لحافر فيك قبره
ــــــــــــــــــــــــــــــ ــــــــــــــــــــــــــــــ ــــــــــــــــــــــــــــــ ــــــ
فلاح
القصيدة رقم (49)
لك حق تزعل
الوجد فاض وضاقت اليوم الافلاك=واظلم علي الكون واقبلت اناديك
ياصيد يرعى من حيا القلب وش جاك=تغيب عني كيف وانا مداريك
لاشك انا من شوق جيت اترجاك =فاسمح لمحبوبك ليا جاء يراعيك
ماهو بكيفي غيبتي يوم نجواك = حكم القدر خلاني ابعد ولا اجيك
يومي قريت الحرف ناضرت عتباك=صب العتب صبه ترى الروح تفديك
رسالتك جتني ولو ذاك مارضاك=ماطيق انا بعدك ولا اقوى تناسيك
صدق محبك والي اشجاني اشجاك=لولا الملامه صحت باسمك اداعيك
فارفق على روحٍ بها دوم طرياك=ماملت انفاسك وفيها مواريك
روحٍ على لاماك ماهيب تخفاك = تهواك من بد البشر في حراويك
من غبت غاب السعد لولاك لولاك=ماجاد قافي وانبرى لك يناجيك
لا تبتعد عن قلب مايوم يسلاك =لك حق تزعل ياحبيبي واراضيك
ــــــــــــــــــــــــــــــ ــــــــــــــــــــــــــــــ ــــــــــــــــــــــــــــــ ــــ
القصيدة رقم (50)
عزف انفرادي
ياقافيه تفرض على الروح الانشاد=لاوزانها والحرف سلطان شادي
ساقت متون الشعرتغني عن الزاد =في ليلي المسهود والجو هادي
من هاجسي سويتها قصر منشاد=حوله نبت زهر الخزامى وكادي
بابه من البطره ثلاثي الابعاد=والسور بعده سور فيه ارتدادي
في داخله كشكول من كل الاضداد=جنه ونار وشي مقبل وغادي
فيه الحروب الي بعهد ابن شداد=وبدر واليرموك ياذكر نادي
فيه السلوم الي على عهد الاجداد=والحبه السوداء وحبة رشادي
فيه الهوى فيه المحبه والامجاد=وفيه حزن وبه من الدين حادي
فيه الصفاء والود ياكل نشاد= وآلام بيت القدس عاينه صادي
فيه العروبه مهزلة كل الانداد=والرافدين الي بسوق المزادي
فيه الخيال الي يثير اهل الارصاد=يعزف على الكلمات عزف انفرادي
اوركسترا لالحانها القلب ينقاد= ترقص لها نجوى ويطرب عبادي
تنساب نشوه تنعش ارواح الاشهاد=من جمعها يحتار فكر انتقادي
لاوالله الا كنك اطراف بغداد = ياهاجسي وش فيك تشعل سهادي
ياهاجسي ماكل ماقيل ينعاد= هذي الخلاصه يوم قلت انت عادي
ــــــــــــــــــــــــــــــ ــــــــــــــــــــــــــــــ ــــــــــــــــــــــــــــــ ـــــــ
القصيدة رقم (51)
العيون السود
انا ماذبحني غير لحظ العيون السود=ورى البرقع الي ناض برقه ورعادي
ليا ساق سهمه للهوى لينات العود =يصيب الهدف مايخطي الرمي ركادي
جنوده حديد ونار ماتنصف اهل الجود=ولا ترحم العشاق في شرعها العادي
تفيض الجوارح من عناها سواة النود=ويزفر صويب الحب ويصير نشادي
يسال القوافي عن سبب حظه المقرود=ويبكي من الجرح المتيم بالانشادي
ليا جر صوته مايجاريه صوت العود=وسلك الربابه ناح من حزنه البادي
تذوب الحروف ويصطلي ليلها المسهود=ويحزى بريقه بين شامت ونقادي
الا ياخشيف الريم ياوردي المورود=ترفق على القلب الذي منك منصادي
خفوقٍ خبرته قبل يلقاك مثل الطود= ومن يوم شافك صار عصفور رعادي
تحوفه ضروف البعد من صدك المعهود=ويختلّ نبظه بين عاذل وحسادي
ينادي على قلبك ويدرى من المنقود=وجمر المشاعر شب موقه والاكبادي
سألتك بمن سواك لاتخلف الموعود=وعجل بوصلك ياعذيقٍ من الكادي
ــــــــــــــــــــــــــــــ ــــــــــــــــــــــــــــــ ــــــــــــــــــــــــــــ
عايض ابو شيبه
القصيدة رقم ( 52)
حقوق القصائد
قالو حقوق القصايد قلت مابه حقوق=حقوق الأنسان ضاعت كيف بأحقوقها
مدام جاء للقصايد وسط الأسواق سوق=اكيد طاحو جميع الناس في سوقها
معاد تتوقف الكلمات وسط الحلوق=ياحظ بعض البشر ماتتعب احلوقها
ياليتها تنسرق ويهون وضع السروق=غير البلا فالعشيقه خان معشوقها
ياكم لمحنا بجو الشعر مثل البروق=مثل السحابه تضيع وتخفت ابروقها
لو القصايد تكلم تشتكي من عقوق=من اهل شعر الأباحيه ومطفوقها
ياليت شعر الفوايد من سباته يفوق=من قبل وردة شبابه تيبس اعروقها
قالو لي الناس روق وقلت وشلون اروق=دام أكثر الناس ضاعت في خطاء ذوقها
شعر النصيحه مع الأيام صابه نفوق=قلته وكبدي تزايد فيه احروقها
متى على الله يجي للشعر لحظة شروق=وتعود بعض القصايد وسط صندوقها
ــــــــــــــــــــــــــــــ ــــــــــــــــــــــــــــــ ــــــــــــــــــــــــــــــ ــــــــــــــــ
القصيدة رقم (53)
الأغاني
يامدور للسعاده بتشغيل ألأغاني = مثل من يبغى السلامه بوسط المعركه
ضاعت الساعات فيها وتتبعها الثواني=والمصيبه كل شيطان فيها تشركه
كيف يمكن للمحرم يوردك ألأماني= مثل طيرن يطلب الحوم في وسط اشبكه
يمكن التفكير عندك يفارقه اتزاني=عمرك إنك شفت بالبر بتعيش اسمكه
للسعاده درب واحد ومابه درب ثاني=احبك التوصيف مني لياقلت احبكه
السعاده بأتكالك على رب الجناني=ربي المعبود والكون بأمره يملكه
له جميع الشكر والحمد وله ألأمتناني=يدرك اللي مالعقول الذهينه تدركه
لو تلف الكون كله وماتترك مكاني= دون طاعت خالقك ماتحصل لأبركه
لاتموت ودقت العود تنسيك ألأذاني=لانسيت الموت فالموت كلن يدركه
تب لربك قبل تندم وثم تبدى تعاني= يوم ودك ترجع وكل ذنبك تتركه
إن تطيع ابليس والنفس ترضى بالهواني=لكن اذكر قبضت الموت لاجاك املكه
قلتها واقولها صدق واعلنها لساني= عمركم شفتوا على البر بتعيش اسمكه
ــــــــــــــــــــــــــــــ ــــــــــــــــــــــــــــــ ــــــــــــــــــــــــــــــ ــــــــــــــــــــ
القصيدة رقم (54)
اعذب الشعر
أحيان أقول إني على الشعر مجبور=وأحيان أقول الشعر مجبور فيني
أقطع على شانه مسافات وبحور=وألقاه في دربي وهو يلتقيني
ماني بتركي لأعذب الشعر مجبور=مادام شعري لابغيته يجيني
الشعر وصفه كتلة احساس وشعور=على الورق ينقل من العارفيني
ماهو كلام أيصاغ في عدة اسطور=ينقل من اللي باالشعر جاهليني
الشعر له منهج ومعنى ودستور=وله موقفن بين الخلايق يبيني
كم شعر باالأذهان مازال محفور=باقي محله لو تطول السنيني
قايله بين الناس باالخير مذكور=مادام ينقل للكلام الثميني
الشعرطب اللي من الوقت مذعور=يجلي هموم اللي بوصفه حزيني
والشاعر اللي صار له جهد مشكور=يامر بفعل الخير في كل حيني
وصلاة ربي عد ماذعذع النور=على محمد سيد المرسليني
ــــــــــــــــــــــــــــــ ــــــــــــــــــــــــــــــ ــــــــــــــــــــــــــــــ ـــــــــــ
رفيعة الشان
القصيدة رقم (55)
لاتنشديني
لا تسألين القلم يا ملهمة حبره=ولا تنشديني عن اللي شاغل ضنونه
انا باعلمك شاللي مخلفٍ حالي=واللي مكدر صفى وقتي ومازونه
تِسدل على يومي احزانك ستايرها=وتطلع بيوت القصيدة غير موزونه
والكل يسأل علامك شاحبٍ وجهك=ولابه جوابٍ مأكد لجل يوحونه
ما تقصدين اني اتكدر ولا اتضايق=لكني احط روحي فيك مقرونه
تكفين يا فرحتي يا قدوتي الاولى=يمه-فديت التراب اللي تدوسونه-
عطيني الحزن والآهات والضيقة=واللي يغير لون صفحاتك بلونه
ودي تكون الثلاثة كلها فيني=ولا انكم في لياليكم تذوقونه
مافيه شيٍٍ من اشيائك خذيتيها=حتى شعورك طلبته لي وتعطونه
يمكنني اعطيك في ايامك آمالك=لكن همك وِضَحْ والكل يقرونه
احط نفسي مكانك وامتلك دورك=واسوي اوقات مثل اللي تسوونه
واعيش يومي مثل مانتي تعيشينه=ولا قدرت اتقنه واعرف بمضمونه!
ياليتني داخلك أو قطعةٍ منك=واعرف مضايقك وان كنتوا ترومونه
وآبيده الحين وآمر كل أفكارك=لا عاد تاتي بما يجعلك محزونه
يا جعل غيم الحزن لا جا يبي يهطل=ويسقيكم امطاره الخَثْرَة وتروونه
ارفع يدي له واوقف سيره بسرعه=قبل يتمادى على امي حلوة المونه
واغلق مسارات ذاك الغيم واحدده=واحط قبله جبال افراح وآهونه
ولاجاك يبغي لك التكدير في ليلة=-بابيعني- لجل فرحك تكثر مزونه
ــــــــــــــــــــــــــــــ ــــــــــــــــــــــــــــــ ــــــــــــــــــــــــــــــ ـــــــ
القصيدة رقم (56)
فاقد العينين
يا مزونٍ عانقت وجه السما=اشهد انك رايقة بال وسعيده
جوديني حالي اعناه الظما=هالكٍ يبحث له ايامٍ عديده
والدلو في ظلمة البير ارتمى=وما رجع للظامي بشيٍ يفيده
صبي حلولٍ تبصّر من عمى=وانقذي المهموم من ما سوت ايده
اختلاف الراي في صدري احتمى=دفّة اموري غدت ماهيب سيده
شفت روحي يومي ابحثني كما=فاقد لعينين يقرا له جريده
ابغي ابدى من جديد منظّما=وابغي افتح فيّ صفحاتٍ جديده
شي ايجابي وسط صدري نما=اني ابحث عن خطاي وما اعيده
ــــــــــــــــــــــــــــــ ــــــــــــــــــــــــــــــ ــــــــــــــــــــــــــــــ ـــ
القصيدة رقم (57)
دمعي المنتثر
بين وُعر الطريق وبين بُعد النظر=لحظة استوقفتني ماتجاهلتها
دمعي اللي كتمته هزّني وانتثر=كيف مدري ولكن ماتوقعتها
جيت باكُفّ هدره لدّني وانهمر=من حرارة دموعي ما تحمّلتها
قلت افا يادموعي كيف تعصي الامر=وكيف يا رمش عيني ما تلاحقتها
قالت انتي بعزمك جابرتني جبر=يوم لاحضت ضعفك ماتمالكتها
من كتم في ضميره صدره بينفجر=كيف اجل في ضميرٍ ماقدر كبتها
قلت يادمع عيني ذي طراة العمر=لوتكون السما مسكانها جبتها
والبن آدم تفَاوَتْ شَدِّتِهْ فالدهر=مرّ ياتيك جلد ومرّ من تحتها
(ماننول النجاح الين نلعق صبر)=والعزوم القوية ينجني نبتها
استمدي من اصغر خلق ربي عبر=كسوة العيد الاضحى جات من نحتها
الارادة ذلولي والعوايق حفر=وان تراخت ذلولي قمت شجعتها
ليت حلمي صغيّر في زمان القهر=كان ريّحت عينك من عنا وقتها
بس ياعين حلمي مع طموحي بحر=مالك الا التِجِلّد لين حقّقتها
ــــــــــــــــــــــــــــــ ــــــــــــــــــــــــــــــ ــــــــــــــــــــــــ
شعيل الزلامي
القصيدة رقم (58)
اليوم الأخير
إلهي أن لك عبد أسيرا=ولا غيرك على فكه قديرا
أسيراً في هواه ,في ذنوبه =كما طيراً معاق عن المطيرا
ليا حاول يطير وصف ريشه=وجد بأن الجناحينه كسيرا
أنا مثله وهو مثلي ولكن=هو أحسن حال ماله من نكيرا
تمنيت أني Nنا اللي مكانه=وهو يجي مكاني لو يصيرا
هنياً للوحوش وللبهائم=ما تسئل عن صغير ولا كبيرا
ويا حسرة على ذرية آدم =من حساباً على الكافر عسيرا
نهيت النفس لكن لا حياة=لنفس في هوا الدنيا تسيرا
ألا يا نفس لا تخشين يوماً =وصف بأنه عبوساً قمطيرا
يقول الله في محكم كتابه=يشيب لهوله الطفل الصغيرا
والا يا نفس هالدنيا غرورا=ويوم العرض تحديد المصيرا
يا جنات أحلت من أستبرق=و أساور فضة ولبس حريرا
وكاس زنجبيل وسلسبيلا=ونظرت عطف من رب خبيرا
ولكن في المقابل شيء آخر=ولا مثله ولا له من نظيرا
جحيم بعضها يشكي بعضها=تنفسها سعير و زمهريرا
تغيض من بعيد ليا رأتهم=كما ربي وصف والها زفيرا
وتشوف الناس تحسبهم سكار=ولكن الأمر جداً خطيرا
من أجله تاضع الحامل ولدها=وراع الفكر من عقله يحيرا
سراط الله ينصب من علاها=بسمك الشعر وبحد الشطيرا
وهذا اللي يخل الرجل يصحي=ويعذر بالوسادة والسريرا
وهو ما يجعل العاقل يفكر=وش اللي يوصله لأقصى المسيرا
هذاك اليوم حرف الواو ملغي=ولا ينفع صديق ولا عشيرا
وفي ذاك اليوم لا يوجد مظالم=يبت بكل شيء ولو يسيرا
ويؤتي بالثقال وبالخفايف=ولو أقل من حبة شعيرا
ويات الرجل شاته فوق ظهر=ويأتي الرجل الآخر بالبعيرا
ولا يطلب جواز ولا هويه=ولا ختم مصدق من مديرا
ولا يوجد حدود ولا سفاره=ولا قنصل ولا يوجد سفيرا
عيال آدم وآدم بن تراب=وابن تراب ما له من نصيرا
يجي التاجر فقير مع الفقارا=ويؤتى بالأمير مع الخفيرا
ويأتي من سكن قصر مشيدا=سواء واللي فراشه من حصيرا
ويأتي من ركب خير المراكب=سواء واللي مطاياه الحميرا
ويتمنا الفتى ولو يرجع=ويعمل خير لو أنه حقيرا
في هذاك اليوم لا يجد التمنى=وقول الله على قولي ظهيرا
ومن يغوى عن الآيات يحشر=وهو يوم القيام لا بصيرا
كما عميت بالدنيا بعلمك=حشرت أعما ليا أنكشف السريرا
يا حسرة من كتابه في شماله=ويا ويله من الشر الشريرا
وهنياً للذي ياخذ كتابه=بيمناً ثابته وخطاً تسيرا
أعوذ برب خلاق البرايا=في ذاك اليوم من لفح السعيرا
إلهي رحمتك تسبق عذابك=أجرني يا مجير المستجيرا
إلهي لا تعذبني بذنب=عليه أندم و أستعفر كثيرا
وكل أمرء غوا مثلي وزلا=وهو يفر من ذنبه فريرا
رجايه يا إلهي بأني أشهد=بأن مالك شريك ولا شويرا
و أو من بأن محمد رسولك=وأشهد بأنه المرسل نذيرا
وملائكتك ورسلك وبكتابك=وبالقرآن نور المستنيرا
و أو من بالقدر خيره وشره=وباليوم المسمى بالأخيرا
ــــــــــــــــــــــــــــــ ــــــــــــــــــــــــــــــ ــــــــــــــــــ
القصيدة (59)
ميزان الرجوله
ياليت والله يصير سباق بين الرجال=في حاجتينه ولايتلا لهن تاليه
منازلن بالكرم ومنازلن بالقتال=وجه لوجه ورجال لرجاليه
والله ماعاد تسمع للمفاخر مجال=اللي تعدى الحدود بوقتنا الحاليه
وتقل كلمة رجل ماعاد ضني تقال=وتشوف بعض الديار من اهلها خاليه
المرجله ماهي البس بشت والبس عقال= والا معك موتر طيب وجواليه
المرجله جود بالثنتين مالا و حال=واللي يشح بحلاله شح بالحاليه
هذه الكلام الصحيح اللي ماحوله جدال=وهذا هو اللي يفرق بين الازواليه
اليوم في نعمه من الله ولكن يقال=تساوت الرؤس فيها هي والاذياليه
صار الجمل يشبه الناقه وهي كالجمال=شوفي بعيني ماهي باقوال تقاليه
اللي منول مع الاجواد روح وتعال= اليوم صارو شيوخ ورؤسهم عاليه
ولااقول انا كامل الاوصاف راع الكمال=الكامل الله وخلق الله هي الباليه
ولا قلتها قصد ي الشهره ولاجمع مال=ولو البشر يعشقون الصيت والماليه
لكن شي في صدري ماعليه احتمال=فركت خشوم الرخوم اللي على باليه
اللي ليا شافو الابطال جاهم هبال=وتصيبهم عله تقول سلاليه
اهل العلوم الكثيره ناقصين الفعال=قلوبهم سود لو اقوالهم حاليه
الله يعز الحكم والدين طول الليال=اللي حما هالوجيه اللي على باليه
ــــــــــــــــــــــــــــــ ــــــــــــــــــــــــــــــ ـــــــــــــــــــــــــــــ
القصيده رقم (60)
ياوقت علمهم
ابي اسئلك يازمن واريد منك الجواب=ابي جواب صحيح احكيه لاصحابيه
اللي يسالوني ويكثرون العتاب=وانا ماعندي جواب ولااعرف اسبابيه
تجعلك دايم علي مكشر الناب=احسبك تضحك معي واثرك تهزابيه
ياوقت قل للعرب هذا الرجل مايهاب=لكن انا الوقت واصل الوقت غلابيه
وعلمهم اني مااخاف اسود والا ذياب=ولااخشى من اهل الدقون ولااهل الاشنابيه
وعلمهم اني ليا جا الليل والنور غاب=انا خوي الليالي وانته ادرابيه
وعلمهم اني معك حملت كل الصعاب= واني وطيت الوعر والشمخ النابيه
وعلمهم انك ياوقت اشبه بطرد السراب= تجري وراه الحيام وتاجد ترابيه
وعلمهم انك ياوقت اللي خطاك الصواب= وانا لواني صدقت اصير كذابيه
وعطهم دروس كما عطيتني في كتاب=انت اللي امليتها وانا الك كتابيه
وعلمهم انك ياوقت ليا نويت الخراب=تدخل بيوت العرب مع غير الابوابيه
طعامك قلوب ناس ودمهم لك شراب=مالك مع الناس عهد ولالك اقرابيه
واخر سوال اسئله ياوقت مدري عذاب=ياللي من اول حياتي وانت حرابيه
ماكفاك كل الذي سويت وانا شباب=وش عاد باقي تبي والراس قد شابيه
ــــــــــــــــــــــــــــــ ــــــــــــــــــــــــــــــ ـــــــــــــــــــــــــ