[الطائر المهاجر]

هنا سنضع كل ما استخدم كرسائل جوال من أبيات شعراء الفطاحلة ،
ورغم أنني لم اكتب شعرا في يوم من الأيام لهذا الغرض ، لكن بالبحث عن قصائدي
في قوقل ، بعد تعرض بعضها للطش ، وجدت ، أن ابياتا كثيرة استخدمت لذلك الغرض:

ودعتك الله لـو على قلبـي اخطيت = وحاربتني من دون ذنب وخطيّه
احسبك تذكرني إذا اصبحت وامسيت = واثرك على فرقـاي نفسك هنيّه
اللـه واكبـر كيـف عنّـي تخلّيت = من بعـد ما علقت روحي البريّه
وش غيّـرك وش بدّلك ليه صدّيت = وانت الذي بالقلب نبض وهويّه
من هو بقى لي بعـدما عنّي اقفيت = وقدمتني للحـزن اثمن هديّه

لو ادري إني يوم ادورك بلقاك = لا لفّ كل الكون حتّى الاقيك
ولو ادري إنّك ما تبيني ونا اهواك = حرام ما يطري على البال طاريك

لان الحديد وقلب من صد ما لان = ما فادت الشكوى وكثر الرسايل
مدري علامه يمكن الحب زعلان = والاّ لقى غيري لقلبه بدايل

قولوا لها الطيرالمهاجر ترى طار=ما عاد يطرى له من الحب طاري

قلبي معك حتى ولو يوم صدّيت = مهما حصل منك الهجر فانت معذور

في خاطري شيٍّ ولا اقدر أطيقه = فاسمع كلامي لو تأخر دقايق
الحب قسمه من اله الخليقه = وغيرك فلا حبيت بين الخلايق

عهدٍ على قلبي ولو باح سدّه = يخفيك في نبضه بعيـدٍ عن الناس
حتى ولو جازيت حبّي بضدّه = أرجي من الله رجعتك عذب الانفاس

علميني كيف احب الكون وافرح به ثواني = واشعر بقيمة حياتي وا تهنّا بالوجود
وارسمي لي خط عشقي في متاهات الزماني = بعدما طالت ليال الهجر منك بالصدود

صوريني في خيالك طيف عابر وافردي= كل جنحان المحبه ذكرياتٍ في خيالي
واسألي الأيام تشهد يوم حبّك مولدي= ويوم ميلادك بقلبي عيد حبي واحتفالي

رياح الشوق سوقي شوق روحي = لروح اللي سباني بالغراما
وهلي وامطري من عذب بوحي= مخاييل التحية والسلاما

روحي بامـان الله دربك تسـاهيل = حبٍّ بديتـه اتـركه باقتنــاعي
روحي مثـل حلمٍٍ طرا تالي الليل = ثـمٍٍٍّ نسيته بعـد ما اصبحت واعي

رسالتك وصلت فلا ترسليها = ادري بكلّ اللي نويتي تقوليه
لا تتعبي نفسك ولا تشغليها = قلبي دليلي فاهمٍ ما بغيتيه

انا مهـاجر الى النسيان ادوّر لحظـة الميلاد = طفل يبكي ، طفل يضحك وباقي الدمع بعيونه

حرام الحب يذبل في الحنايا = وانا منك قريب ولا دريتي
حرام الظلم لا ذنب وخطايا = فانا مقوى على هجر قويتي

حرام الحب يذبل بالمآسي = حرام احلامنا تدفن صغيره
حرام سنين من عمري اقاسي= ضياع ولا دريتي بالسريره

اقسى الفـراق اللي يهزّ الجبالي = لا من تفرّق حب عن حب باجبار
يبقـى خيـاله يتبعه كالظـلالي = ما يقدر النسيان لـو كان جبّار

أول العيد عدّى قلت ابصبر عساني = ثاني العيد ودّع قلت عذره معه
ثالث العيد ماله حسّ كنّه نساني = قمت افكّر واهوجس وش حصل ومنعه

انا ما عـادني بعـدك بنفس الشكل والاشباه = تغيّر كل شئ فيني اعيش الـوقت واكداره
من همـومٍ على قلبي وانا الصابر على بلواه = يساهر ليله المعتم بحزنٍ يعمي ابصاره

اهلاً هلا باللي له البال ينساح= لا من سمعته اشعر بردّة الروح
صوته يصحيني كما العطر فواح= يحس به قلبي ولاحتاج لشروح

انتي معي والا مع الوقت ضدّي = يا جارحه قلبي جروحٍ جديده
مدري علامك مستمره بصدّي = ان كان لي ذنبٍ ذنوبك عديده
اتعبني المشوار قيدك بيدّي = وش لون افكّه وانتي عني بعيده

انا من كثر لوعات الزمان ولعبة الاقدار= تعلّمت الصبر واهمل جراح القلب وطعونه
ولكنّي انا انسـان بشر يتحمّـل ابمقدار= ماني مثل الجمل لازادت احموله يجرونه
اطيح جدار متواسي ولكن ما يثير اغبار = صويب ولا نزف جرحه ولا يدرا بمكنونه

انا كل ما اسلى حرّك الناس لاوجاعي = وتبـدا جراح القلب تنزف من اوجاعه
يقـولون ما للحبّ في هالعمر داعي = اذا شاب راسك فاتركه وابتد الطاعه
وانا من زمان أول بمحرابها داعـي= قيـام وتهجّـد ما ادري الوقت والساعه

الله يردّ المسافر طوّل الغيبه = لو هي اسابيع عندي عدّة اعوامي
له وحشةٍ زادت بقلبي لواهيبه= من حرها اوجس النيران بعظامي
البدر لا غاب ماللكون من هيبه= مهما النجوم كثرن باعداد وارقامي

حبيبي لا تظن أنساك مهما كانت الأسباب = عليك الله وامان الله دروب العشق ما امشيها
على الذكرى اعيش اليوم وبكره ما حسبت حساب = لأجمل من مشى بالأرض غيرك لا.. ولا..ابيها

ا

ابكتب من لهيب الشـوق الى من همها امري = جراح الهجر حرّاقه وليل الصمت ما طيقه
اقضّي العمر في غربه بلا شمس وبلا بدري = ظلامٍ دامسٍ حولي بجيش الحزن والضيقه