طعنة عدوٍ لك تعرفه وتدريه = تبرى مع الأيام لو هي عميقه
وطعنة قريبٍ او صديقٍ تداريه= ما اظنها تبرى ولو هي عتيقه
فاخذ الحذر في وقت بانت مواريه= غيّر مبادي في نفوس الخليقه
ما عاد تدري صقرها من حباريه= وحتى غراب البين غيّر نعيقه
لا من سمعته تنخدع في محاريه= تحسبه ورقا باللحون الرقيقه
ورجلٍ بلا مبدأ ولا خاف باريه = عايش مجون وتايهٍ في طريقه
حتى ولو يعجبك لحنٍ يثاريه = بياع هرج وكل مكرٍ يحيقه
ودك على علباه بالنار تهريه = وتطرده ما يجلس معك لو دقيقه
مجلسه عار ومن يحاول يذريه = مثله خنا فاتركه يلحق صديقه
اضرب على الكايد ولا تجيب طاريه= ولا تخاف غير اللي خلق للخليقه
جلستك مع حرٍّ على الدين تشريه = ولا مجلس للبوم يغري بريقه