كفا منك يالغالي قسى البعد والهجران = و انا صابر و حالي تزايد بلاويها
حياتي بدونك عشتها بعالم الاحزان = ولا ادري حكاية حبنا ويش تاليها
ولامن بغيت انسى يعاندني النسيان =تغربلني الافكار و العين مشقيها
جيوش العنا بالصدرحطت لها ميدان = و قامت تدك القلب في جوف داعيها
على قلبي الغارات دوّت كما البركان = و ثارت قنابلها على اللي يواسيها
نويت ابذل المجهود للشاكي الحيران = و انا طامع الهدنه و خابت مساعيها
الا يالطيف الروح يا قايد الغزلان = سهوم العباير و الجفا ليه ترميها
انا ما خبرت اني بشرع الهوى غلطان = ولا مخطي و جاني على حكم قاضيها
شهود الموده عندكم قدمت برهان = و حجتك يالغالي على ويش بانيها
دخيل الوله و الشوق والحب و الوجدان = تروف بحياة مولعٍ رايحٍ فيها