[عصام عبد الحميد]

المشاركة الأصلية كتبت بواسطة محمد اسماعيل الرفاعي

تـتـذكّري؟
يوم قلتي لي :-
(ممكن تسيب روحك معاي لحظات وبس؟ )
ومن غير تردد سبتها وخليتا ليك
جواي كان عايش أمل
داير يروق ليها المقام
لامِن دوام تتملّى فيك
داب في البعاد كانت
تملّي بتشتهيك
وبين بينا كان بتحنّ ليك
ولازماً كمان تركن إليك
يوم تبقى ملكك وبين إيديك
وقمتي يا ست الحِسان
قعدّتي في بمبر أساي
أجّجتي نيران الغرام
هزيتي كانون لوعتي
وقليتي بُنِّك في حشاي
قلّبتي زيين .. لامِن أخد
لون سُمرتي
دقيتي في فُندُك رِضـأي
خليتي يتشظّى ويبوح
يشجيكي بي سر لهفتي
غليتي في موية دموعي
الصابة من أحرف غُناي
كبيتي في فنجان هواي
طعّمتي بي سُكّر صفاي ونشوتي
والزنجبيل كان نكهتو الوازناهو
أوتار نمّتي
بكّرتي بي قهوة شذاي وفرحتي
وتنيتي من نوراً سطع
من مهجتي
والبركة كانت إنشراح
شايل ملامح حب عفيف
ياما اتحبس بين الضلوع
مدسوس وراء
حدقات عيوني في مقلتي
والليلة بينات الدخان
يا الحلوة إتسرّب مرق
وقال ليكي يا ست الحِسان
بهواكي مما كُت صبي
أنا كنت راسمك في الخيال
مستنّي وكت الحين يحين
واتنسّمك
شان تبقي ناري وجنّتي

4 / 6 /2010م

احى الفاضل / ابوملاز

ان اسلوبك هنا

يجعلنى اتذكر تلكالبساطه والعفويه فى

الحديث وتلك الطيبه التى ترتسم غلى ملامح الكلمات

شكرا لك اخى ودمت بحب