[جلال ابراهيم الصبيح]

السلام عليكم ورحمة الله وبركاته

جرت المحاورة يوم الثلاثاء 1\8\1431هـ

ابوريتال=
ياجلال استمع لي فيه علم خطير=وانت شاعر وتفهم في جميع العلوم
جلال=
يا رفيقي علامك ليه تنشد كسير = شيبه بالهوى يا هيه كثر السهوم
ابوريتال=
ويش قصت مريض نام فوق السرير=زاد في جسمه الامراض وايضا هموم
جلال=
قصة الشوق ياللي بالمحبه شوير=صاحبك عايش الحرمان في كل يوم
ابوريتال=
لبسوك الثياب الناعمه والحرير=ليتهم علموني ثم اقول مخدوم
جلال=
منت صاحي وشكلك فيك شي خطير = أشهد ان الملوع طايحن ما يقوم
ابوريتال=
كان ماتعرف المعنى ولا انته خبير=فانشد اللي يعلم كيف ضرب السهوم
جلال=
قلبي اللي تعنى من زمانه كثير = شوف له حل يا من عندك الحل دوم
ابوريتال=
فيه شاعر كبير وفيه شاعر صغير=وفيه شاعر مايقدر وسط بحري يعوم
جلال=
بحرك اللي تظنه هايجن ما يحير = أقطعه مثل سيفن قاطع للجسوم
ابوريتال=
طير ياطير عنا يم ديرتك طير=فيه حر على روس الحباري يحوم
جلال=
أنت وحدك تطير و غيرك اللي يصير = هدهدن فوق رمل البيد كنك تحوم
ابوريتال=
روح وألعب مع اللي وسط سودة عسير=بين خضر الشجر من تحت سود الغيوم
جلال=
أنت شكلك مريضن أو فؤادك ضرير = ماتشوف الأمامك قايدن للقروم
ابوريتال=
اقطف الورده الحمراء وكب الشعير=انت طيب وعنهم يالصحيب محشوم
جلال=
لا عدمتك رفيقي يالحبيب القدير = خذ ورودي وهات الفل وقت السموم