الاخوة اعضاء وزوار منتدى الفطاحلة الكرام السلام عليكم ورحمة الله وبركاته
يسعدني ان اشارككم بهذه القصيدة (المقناص) على امل ان تحوز على رضاكم واعجابكم وهذه الهواية هي سبب انقطاعي عن التواصل معكم في هذا المنتدى الرائع .
يامل قلبا على الطلعات شفقاني = مشتاق للبر واالمقناص والشله
مشتاق للرفقه اللي شانهم شاني = اللي على منهج الاسلام والمله
كلهم رفاقه ومن ناسي وعرباني = مافيهم النذل والا الخبل والعله
من فوق جيب جديد صنع ياباني = جاهز مجهز بمطلوب الخلا كله
في ديرة كلها اهضاب وودياني = مايدوسها غير جيب والدبل تله
لاجيتها اعصير متانس وطرباني = والليل مقبل وكل شيا طرح ظله
ومديت شوفي ولا طالعت سكاني = ماغير روس الشجر كاسيته البله
وقررنا فيه المبيت ليومنا الثاني = في وسط روضا و تو السيل غاشن له
ارضا جلد ماهي رمال وكتباني = جرعوب سيلا بوسطه تاجد السله
وشبيت ناري مع المغرب مسياني = والعفش من موتري بدري منزله
مستانس بجوها من بين الاخواني = والجو هادي وجلسة كلها فله
وتشوف وجه السما بالنجم مزداني = سبحان ربا بضو النجم زينله
لا هود الليل وكلا صار نعساني = كل يدلي على فراشه ويشتله
والصبح صحيتهم من قبل الاذاني = والقرص جاهز مع البراد والدله
و من قبل يظهر شعاع الشمس ويباني = اللي نوي الصيد راس الضلع واصله
وتفرقوا للقنص ذربين الايماني = كل مشى بالطريق اللي تسهله
وقت الغدى يوم ربي جابهم ثاني = كل رجع للغدى باللي كتبه الله
والله هذ هو اعلاجي من احزاني = لازاد همي من المسكا ن بالفله
والناس في ماتحب اشكال واللواني = وانا غرامي مع المقناص مامله