كفكف دموع الحزن ياطرف نعسان = ماحب اشوف الدمع في محجر العين
قطرة ندى سالت على ورد نيسان = ماتروي الضميان قد جفت العين
يالي تراودني بعطفك وحمسان = دوبي دريت انك لقلبي تراعين
لو جيت قبل اليوم لنصير فرسان = ونسطر التاريخ من عام تسعين
يكفي عذابي مابقى الا صدى انسان = راح الشباب الله على التالي يعين
ياحزن قلب القدس ياجرح ميسان = ياعرض داسوه اليهود الملاعين
يافرحةٍ حلت في قلوب عرسان = يانشوة المشتاق الى وين تسعين
من عقب هذا الحمل مالي بكيسان = مالي بحبك ماسمعك يوم تدعين
ماتت مشاعرنا بلا قلب والسان = ماهمنا الا كيف نشري المواعين
حتى حروف الحب حمقى وخرسان = من يوم رايتنا مع ام الكراعين
ياوجد روحي من يغيث اهل بيسان = من ينجد الملهوف مات الوراعين
احساسنا فاتر ومشروبنا سان = فاز المجاهد يوم يشفع لسبعين
لو شافنا عنتر ليهجي وغسان = مهطعين الروس ولهم مطيعين
علو علينا رغم تاريخ حسان = هذا المقدر بالصناعه بريعين
يالله تعز الدين ياراعي الاحسان = واحفظ بلدنا من شرور الفراعين
تمت وصلو عالنبي نسل عدنان = محمد المختار وين المصلين