[الطائر المهاجر]

تمت مساء الأربعاء 4 فبراير 2010

اسير البدر=
انا اسمي اسير البدر والبدر لي سجان=وانا راضي بالسجن لوبه محقريه
ملاك الحسن انتي وانا العاشق الولهان=ياكيف التقينا في رياض السعوديه
الطائر=
اخافك لقيت اللي لفى من ورا القيعان=تحسبه اصيل وهو من الأصل شاميه
اسير البدر=
لا والله لقيت الاصل والفصل والوجدان=وباموت وله في داخلي الف ماااريه
جنوبي قصيمي له بنجد العرب عنوااان=سلب عقلي بدرب الهوى لعنبو حيه
اذا الحب وصلك مايشاورك يافنان=وكم فارس في الحب خابت هقاويه
الطائر=
ترى الرجل لامن صار عقله خفيف اوزان=غدا اضحوكتن للبيض من كل جنسيه
فخله ثقيل في الثقل يرجح بثهلان= تجيك العذارى طايعه تضرب تحيه
اسير البدر=
انا لي عقل يوزن بلد واسمه الميزان=ولكن قلبي لو عشق باح خافيه
انا لي عمر مااحب قلبي سواها انسان=محبة شرف ماشفت منها ولا سيَه
ولا كل بيضى تجذب القلب والوجدان=مظاهر شكل ماهي تعرف الرومانسيه
الطائر=
لأنك شبابٍ دون خبره بها الميدان= ولا تدري ان الحب فن الهواويه
وقعته على راسك بلا اسم بالرحمن=مع اللي خبيره كيف تعطيك حنيه
تحسبك مثل صياد لاركد النيشان=وصادك حبارى دون جهدٍ ومشقيه
اسير البدر=
يمر الزمان العذب ويجي بعده ازمان=ويبقى بعيني كل ماحل طاريه
الطائر=
غديته مثل مسحور مافاد به قرآن=ولابد فوق الهام يحتاج له كيه
اسير البدر=
تذكرت عصر فاات واستغفر الرحمان=ويار ب سامحني اذا لحقني سيَه
الطائر=
اذا كان لعب ومزح فالأمر ذا سيان= تعلم دروسن ثم تنسى الشقاويه
اسير البدر=
ولكن اسير البدر والنابغه عثمان=خذوني لوقت فات يااطول مااضيه
الطائر=
اباخذك يم النور ياصاحبي الغلبان= لعلك تصحصح بعد نوم الضحاويه
اسير البدر=
ياربي اسالك تغفر الذنب يامنان=وتكتب لنا عفوك وتصلح لنا النيه