[مروان الشيخ]

لاصار من يرمي بساقط كلامه=جاهل..فلاني باتشره على شان
هذي كلاب ولا عليها ملامه=تنبح ولا اظن السحابه بتنهان
لا صاح بي واطي وانا فوق هامه=يسمع صداه وكن صوته لي لسان
لن كان هرجه هو كنانة سهامه=يبطي وانا درعي من الهرج ما لان
ما ادس راسي يا شبيه النعامه=ولاني كما الحربا لها عده الوان
صدق النوايا والوفا والشهامه=طبعن ورثه والنقا شطر الايمان
والا انت يا وجه النحس والندامه =لانته من المعزا ولا انته من الضان
كله ولا تاصل لحد الكرامه=ثمن تعرف الصدق من ضحك الاسنان
مير البلا لا سايرك فالسقامه=شخصن توده له مكانه وله شان
اشره على اللي له بقلبي علامه=كنت احسبه للصدق والحق عنوان
رح الوفا ما باقي الا حطامه=يوم انتخيبه ما فزع لي ولا بان
لن كان ما عاش الجمل من سنامه=ماهو على حمله ولو راح شفقان
[هذا عذر] :ما شوه الخد شامه=لامن خطا الغالي نقابله باحسان
باغض طرفي واعتبرها سلامه=لن الخطا والذنب من طبع الانسان