[احمد الجريفاني]

مثل الجبل ما هزني قالن او قيل=ما دمت اميز هامتي من رجولي
ابعد عن دروب الخفاف المهابيل=ولا يهمن هرج كل امهبولي
وان خاطبن عاقل سليل المشاكيل=اقف واهللي به وانوخ ذلولي
اعطيه من راسي علوم وتفاصيل=واخذ علومه وابتعد عن فضولي
ولد العرب لاصار ما ينطح الشيل=ولا يعرف المرجله والاصولي
ولا بهر الدله وحاف المعاميل=عزيمته جبنه ولبنه وفولي
وخر عنه يا عل دربه تساهيل=من شان يبعد لايصول اويجولي
من كلمتن تعرف نصوف الرجاجيل=ومن كلمتن يعرف سليل الفحولي
كبر الجهامه ماتهنا به الفيل=لاسمعتن زينه ولا زين زولي
طير الرخم يدبك بليا محاصيل=يخاف من ظله رعاعن جفولي
والصقر له سمعه وقيمه وتبجيل=لا ضاع صاب اللي يهده ذهولي
خشم الجمل يفرق كثيرن عن الذيل=والبشت حشمه والردى للنعولي
زين الرجل لاصار عاقل وحلحيل=يعجبك لامن صار فعلن وقولي
ياويل حالي ويل ويلن على ويل=هذا الزمن شاهدت شين يهولي
شفت الهمج ما تعرف الجدي وسهيل=يضيع لو عمره ثلاثين حولي
ويبدا يصيح اليا امطرت واقبل السيل=يشكي على ربعه يقول افزعوا لي
خطوه بخطوه لا تعدون با الحيل=وليا مشوا خطوه يقول اوقفوا لي
(الدلة اللي ما تبهر من الهيل )=ما تشربه حتى السلق والعجولي