بالأمس القريب إطلعنا على قصيدة للشاعر الكبير و الراوي المعروف
( فواز ابن غسلان )
التي مطلعها الابيات التالية ،،
من طاح ما حوله من الناس عتبان = أو يسمعه رجل خواله عتيبة
فهو طايح رجواه في كان ما كان = يلقى الفزع والا حدر في مصيبه
وهي على الرابط التالي ،،
http://www.ftahilah.com/showthread.php?t=29800
فـ جاء ردي المتواضع كما يلي
مما جرا و إنقال سخـّرت قيفان = و ارسلت مرسولي لقافي يجيبه
عوّد لي المرسول بالحال عجلان = قال الطلب جبناه لك وش تبي به
قلت أرسله للي لهم قدرٍ و شان = فواز ذاك اللى دروبه صعيبه
دربه وعر ما يعبره كاينٍ كان = يتعب على دربه ركايب صليبه
فواز ابن غسلان يا نسل فرسان = مدحت و الممدوح ربعي عتيبه
اللى لهم بالمجد رآيه و عنوان = كل العرب تقراه و كلن دري به
شهادتك تبقى على الصدر نيشان = يفخر بها المعني شبابٍ و شيبه
يجبرني الموقف على رد عرفان = معه التحايا و الثناء فاح طيبه
من يفعل الاحسان نجزيه إحسان = و من قال قول الحق يا طيب طيبه
لو كان يالزيزوم بالرد نقصان = منك العذر والعفو رسم الضريبه
موقفك يافواز ظاهر للاعيان = موقف شرف بلعون ماهى غريبه
حيث ان لكم تاريخ فى وسط ديوان = إمسطر و مشهود ما ندعي به
طيب وكرم و أمجاد يا الحر شقران = محدٍ من العربان والله يعيبه
لو كان بعض الناس راضى و زعلان = وأحدٍ على الضلعان يحفر قليبه
كلن على مبداه ضاوي و شقيان= و كلن بمجهوده يحصل نصيبه
و لو كان كبر الروس غايه وبرهان = إن كان للثيران حق و طليبه
شتان مابين المعالي و علان = ما يقهر المقهور كود الغليبه
بيّـنـتها بيتين والقصد لفلان = اللى على رده لطمنا نحيبه
و آعود للغسلان مع غصن ريحان = اللى يعرف سلوم ناس عريبه
راع الوفا و الطيب والعز به بان = اللي على العليا مكانه رضي به
شهمٍ شجاعٍ فذ من ساس شجعان = يا سِعد منهو من العرب يعتزي به
دايم على العسرات ترجح له أوزان = أهـون فعوله كايداتٍ عصيبه
ساس الكرم و المجد من عهد و ازمان =ساسه مجيد و زاد فوقه نجيبه
ما قلتها يالربع زورٍ و بهتان = ولا مقصدي أنشر دعايه مريبه
الأمر محسوم ولا فيه إعلان = ما يذكر الياقوت مثـل الزبيبه
و صلاة ربي عد ما هلت أمزان = دنــّـت رعايدها و سيـّـل شعيبه
على النبي الهاشمي نسل عدنان = اللي الخلايق كلها تقتدي به
