بين ما احبك.. واحبك.. واكرهك واذوب فيك
وابعدي ماطيق وصلك.. و ارجعي لا تبعدين
بين اسرك وانطلاقي.. واشتكيلك واشتكيك
وطيف ذكراك الحزينه والتوجد والحنين
والشتات اللي جمعني بين عقدة حاجبيك
والعذاب اللي نثرته فوق خد الياسمين
ابتدت رحلة خفوقٍ ما رضى غيرك شريك
وانجرف مركب هوانا في بحر سره دفين
يوم غبتي كل نبضه من خفوقي تحتريك
واستحال العمر كله في رجا وصلك رهين
وش تفيدك (لو) لامن فاتك الوقت ونسيـــــــــك
لا نحل جسمي وجسمك من مناشير السنين
جاوبيني لو بنظره واترك العالم واجيك
اقطع الشك بيقين الشوق بين العاشقين
قادك المركب لمينا ماجفاك ولا نسيك
يحضنه اول رصيف ونسمه الشط الحزين
اعترفلك كم احبك واعشقك واموت فيك
والشعور اللي سكني مات شكه باليقين
ما اقول اني أبيك.. وكل مافيني يبيك
بس اقول انتي انا ..مقدر فراقك لو تبين