[الخنساء]

المشاركة الأصلية كتبت بواسطة الطائر المهاجر

ودي مثل غيري يجمّد شعوره= واكتب قصيد الحب للي يحبون
واترك قصيدٍ مبعداتٍ بحوره= واساير التيّار في موج مضمون
لكن قلبي ما يطيع المشوره= مهما احاول مايبي تقل مشطون
يحب داره في الغياب وحضوره= ولوهو عطاها الروح لازال مديون
حبي لها ماهوب نزوه وفوره= ولاني من اللي بالمحبه يغنون
تسكن بقلبي ما سكه في جذوره= حتى مع النبضات تجري على هون
احبها والحب عند الضروره= يفرض على العشاق ما تخفي شجون
وقلبي يحسسني بواضح قصوره= لو ما يحس بحالة اللي يعانون
يضيق صدري ويتكدر سروره = لا من دريت ببعض ماهم يكنون
لا نيب مظلومٍ بقلبي حروره= ولا نيب جوعانٍ ولا نيب مديون
اخذت من حلواتها والمروره= وعرفت معنى الفقر واللي يجوعون
فاضطر اكتب وانقل بصدق صوره= عن واقعٍ منه المساكين يشكون
انخي صقورٍ في المواقف غيوره= معروفةٍ بالفعل ..ماهو يقولون
تعرف اصيل الشعر ما كان دوره = مثل المرايه تعكس الشكل واللون
ينقل صور لاهل الفكر والمشوره= عن حالة اللي بالفقر دوم مطحون
من عاطل يشكي من الوقت جوره= ومن أرمله بزرانها دوم يبكون
وعن طالب محدٍ جبر في كسوره=يحرم وغيره دون مجموع يمشون
وعن اجنبي متستّرٍ خلف عوره= يعطيه الف ويبلع الاف مليون
حتى المشافي ضفها في بحوره= من دون تسعيره ولا فاتح عيون
يلعب على كيفه فلا من خطوره= ولا من شبع بيح من الحقد مكنون
وعن فاسد من دون تدهن سيوره= لا شي يمشي لو يوافق لقانون
وعن تاجر الممنوع ينشر شروره= دمّر عباد الله من دون يدرون
ومن حق داري نكشف اللي ستوره= تثّر على مجدٍ له رجال يبنون
ومن حقها تسمع حروفٍ غيوره= فحبٍّ بلا غيره تماثيل ولحون
واجمل ورود الحب وافضل زهوره= إنك تحب بصدق في الحب مفتون

صح لسانك مليون ولايكفون
قصيدة جزلة من شاعر جزل
سلمت ودام حرفك