[دايود صالح الخلف]

جتني رساله باحد الايام من ( حرمه ) ان فلان مسوي حادث بدباب وهو مسرع
وادع ان الله يشفيـه وحالته صعبه وحنا بالمستشفـى
المهم انا انفجر راسي من التفكير يعني قلت بس الرجال فيه بلا
وشـيّ كايد ( ونسيـت ان للي عطاني هالكلام حرمه )
وزي مانتم عارفين الحريم يكبـرون السالفه ههههه
وكتبت هالابيات قبل ما اعرف انه بخيـر ..
والحين الحمدلله الرجال باحسن حال وهي مجرد رضوض وكدمات خفيفه

عبر الاثير اليـوم جتـني رساله=مضمونها ياولد الاجـواد دعـوات
( دعـوات ) لأجل اللي مرقــّـد بحاله=يرثى لها والله ماشاف لذات
( لــذات ) في هاليوم ماجـت ابـّاله=ماعاشها ياكـود هـم ٍ وحسـرات
( حسـرات ) زادت يوم ساق ابجهاله= ثم ٍ غـدر به وانقـلـب عـدّ مـرات
( مــرات ) لين انـّه توجـّع وجا له=عـدة رضـوض ٍ سـببت مر الاوقـات
( اوقـات ) مـرّت في غبـون ونكـاله=يوم إن ّ فكـري خاف من قولهم مـات
( مـات ) الكلام وجاء لصـبري مجاله=اللـه يخـسّ الفكـر جـاني بشينـات
( شينات) يوم ازهـم وتسمـع مقاله=مرات مغلــق والعديـده ابرنـّـات
( رنـات ) ما ردو عليّ ابوصاله=مـن شان ابسمع صوته العـذب لحظـات
( لحظـات ) عشـته بالرجا والدعا له=حيـثه عزيز ونـور في كل ظلمـات

الاثنين
9 / 5 / 1430 هـ