وش كان عذرك.. مشغول..


سمعت عن ولد قريتنا يوم إنه تخرج طلب وظيفة بالمدينة ..أهله كانوا معارضين وأكثرهم أمه... المهم تطور الأمر ...و صارت مشاكل..وهنا انتقل للمدينة لإجراء المقابلة الشخصية..
نجح فيها وتوظف..راتبه ما عليه..المهم تكبر وصار ينظر للقرية وأهلها باحتقار ..
ومرة شفت أمه بمناسبة وبس رجعت البيت كتبت هذا بلسان أمه أناديه..
وليته يسمعني..



تعبت أدور عليك أبأخذ أخبارك..
تعبت أسألهم وين ألاقيك؟!
وكلهم ما جاوبوني..
يعلم الله ما كنت إلا ابتطمن عليك..
ليه..
ماأدري..!!
أنت ضعت بزحمة هالمدينة؟!

هالمدينة علمتك تقّسى على حضن كان يدّفيك.. وصدر كان يغذّيك..وعيون كانت تغّطيك..

كله مشغول يا نظر عيني..
بس دق وطّمني..
مستخسر فيني مكالمة..
ليه يا نظر عيني..
خليتني أبين للناس إنك منقطع عني..
خليتني أسمع كلام ما كان ودّي أسمعه..
بس دّق وطّمني..
لا تحرق قلبي أكثر..
أنا ما أدري أنت حّي والا مّيت..
أنا ما أدري أنت مّيت والا حّي..

أنا ما أدري يوم إنك جفيّت أمك وش جنيّت؟؟
تعال يا وليدي أبضمك قبل ما يأخذني الموت..
وإن كنت مشغول ..لا تجي الشغل أهم من أمك..
بس اطلب منك..
لا سمعتهم يقولون أم فلان ماتت..
لا تستخسر تجي وتدفني..
تكفى يومها بس أطلبك لا تقول مشغول...