لاجت بعيني قلت: هذي حلاياك= ولاجت بقلبي قلت: هذي مواريك
وشلون ابتذكر وانا ماقدر انساك=وشلون ابنسى..لاتـذكرت ماضيك
يالغاليه ماجت على كيف يمناك =ولو هي علي اغرس يديني باياديك
الين ينبت ورد.. ويتـفتح رضاك=وعطره من انـفاس الموده يناجيك
لو هو تراب الارض يفرح بممشاك=ولـوهي نجوم الليل تسهر لياليك
ماكـن شمس الحسن تشرق بلياك=ولاكـن طول سنين عمري تـلبيك
كني يتـيم ..وكل ماطال فرقاك= تكفلـّني أجمل ذكرياتك ..وأغنيّك
وانا الجروح الي بـروحي ترجاك=وانت الدواء..وانا اتعـافى.. بطاريك
شلون اجل لاشفت طـلة محياك=والله لاطيب .. وشفني ..أقبّــل يديك
والدمع في عيني تودد بـلقياك=دمعـة فــرح ..لاتشغــلك ..لاتعـّنيك
تسلم يمينك وأنت أجمل هداياك=نظرة عيونك عقب بسمة تغليك
تحكي لي بنظره وتبدي نواياك= ومن لهفة أنفاسي ..كأني احاكيك
يانور عيني ..وكل نظره تمناك=ياشوق قلبي ..وكل نبضه تناديك
وش لي بعيني كان غابت حلاياك=وش لي بقلبي كان ضاعت مواريك