ياشريط الذاكرة ما فات ليش اتعيده =احسب اللي تحفظه مع هالزمن متلاشي
قلت وقت فات يكفي لاجل يطوي قيده=واثر حبه في تجاويف الحشى متلاشي
واثر مفتاح تلاعاده بس لمسي ليده =وابتد بي من جديد اتقول توه ناشي
كل كلمه قالهل تسمع لها تنهيده =قال تذكر واذكر اللي يقصده وانداشي
قال تذكر يوم احط لجبهتك تبريدة=يوم دمعي فوق خدك تقل وبل رشاش
لو نسيت اشياء فلا انسى همزه وتكميده=هو طبيبي لا مرضت وغرفة الانعاش
يا زمان الوصل انا اذكر شي ابي توكيده=له رباعية ذهب تلمع تقول فلاش
وعين حر وان شهر جزل الحباري صيده=وكفه الين من حرير لف له بقماش
ولو بغيت تشوف وجهك فالمراية جيدة=ولو تبين خده ابيض من بياض الشاش
ولو نباه اسجله واطب سوق بريده=كان ما ينقص عن المليون سعره كاش
كل قلب به ليان يسر من ترديده=وكل صب مدنف سمعه يجيه خراش
ارمي المعنى بعيد وكن ماني ميده=وكل جسمي لا نظر يمي يجيه رعاش
واثر سجنه وسط قلبي مدته تابيده=ما يفكه حفظه المصحف ودفع الراشي
واثركتم الدمع بالقلب العليل يزيده=وغرني ظني بصبري مع رباطة جاشي
والله ان شعر الغزل في هالزمن ما اريده=مير من خلد بهالدنيا هو الغشاش
جرني حتى التقيت بحظرته من كيده=ودزني في معمعة هالمعركة وانحاش
لايمي قله كثير اللوم ويش إيفيده=ما سمعت اللي يلوم من الملام اعتاش