ودي أموت اليوم ، و أعيش باكر ..
و أشوف منهو بعد موتي فـقدني !!
و منهو حملني لين ذيك المقابر
و أشكر أنا كل من كرمني و دفنّي !!
و بأشوف يرثيني أنا كم شاعر ؟
و منهو تركني و ما كتب شي عنّي !!
شخصٍ تعنـّى لي ، مع إنه مسافر ..
و شخصٍ قريبٍ ، و أنا ميـّت طعنّي !!
و شخصٍ يمثـّل دمعته ، ماهو قادر !
و شخصٍ تطيح دموعه كل ما ذكرني
و منهو من أهلي في العزا كان حاضر
و منهو دعى لي في صلاته و رحمني
و منهو بنى بإسمي سبيل و منابر
و منهو يفزّ قلبه إلا من لمحني
و منهو عشاني طول الأيام ساهر
و منهو ثلاث أيام راااااح و تركني !!
و منهو يرتّب غرفتي ، و الدفاتر
و إن شاف صورة لي ، مات و حضنّي
يالله عسى ما تغفى كل المشاعر
( و يالله عسى ما ينصدم يوم ظنّي )
خايف يروح العمر ، و أكون خاسر !
و إن طار طيري ما يفيد التمنّي
( و خايف يجيني وقت ، أكسر خواطر )
إن دارت الدنيا و زماني كسرني !
و مادام هذي الدنيا صارت مظاهر !!
و كل من على كيفه و جوّه يغنّي !!
صحيح مُسلم ، لكن الهمّ كافر !
كل ما بغيت أضحك يهدّدني حزني
الضيق وافي ، و الحزن حيــــــــل وافر
و الجرح أكثر شي شفته يحبني
عايش و ميّت بين ماضي و حاضر !
و الصبر مفتاح الفرج ، ضاع منّي
قل وش تبي و تتركني ياحزني ، آمِر
مسكين فرحي ، تصدّق إنه وحشني
شاعر و لكني ما نيب شاعر
ودّي أموت اليوم ، و أرتاح منّي !!
قصيدة : مرثية شاعر ...
للشاعر / أحمد الصانع ...