قل للفلوس اثيابنا ساده ولافيها جيوب = يللي ماعندك مال وش لك فى الجيوب اتحطها
تدري إن حطك جيب خالي ذنب من أقوى الذنوب = لاتبلش إبها قبل تاطاك ألامور أتوطها
فقير لكن مايعيب الفقر فيني غير ثوب = وانا بلادٍ صعب تفصل بحرها عن شطها
خل ألاوادم عاد مختلفين غالب وامغلوب = احظوظ تلعب دورها .. واحظوظ واضح لطها
لولا ألامل بالله كان اتوقفت خضر القلوب= الارزاق والاعمار ربي في كتابه خطها
العمر فى الدنيا ورق ..والموت فى الدنيا هبوب = أدناة هبـّـه ماوقف أثقل ورق في خطها
فتىٍ ما يـُحـّسب فى الرخا ماهوب فى الضيق امحسوب = شهادةً أشهد بها لله ولا أغطها
دحلان له (غزه) ورام الله (لجبريل الرجوب)= وبحيرة البترول بالبنزين يسبح بطها
اللي مايضماء مايقدّر لذة الماي الشروب = واللي مايعرف شالها .. واللي مايدري حطها
فلا تصدّق فى المزون إلا لاخايلت النصوب = وصيةً وصـّـابها اللي كل قمه نطها

عز الله انك ياعلي شاعر عسيرا ت الدروب = الفاتنه عيت على غيرك وجيت اتجطها
صوتك يدوي في شمال المملكه قبل الجنوب = والقافيه نفح الخزامى والبختري عطها
لو تشترك في شاعر المليون قومت الحروب = هذيك تكمخها على الهامة وذيك اتسطها
ياراية الشعر الحقيقي قلت والقول امحسوب = مانيب قايل هرجة ٍ يكتب عليّه مطها
بالمختصر ياصاحبي وش غير احوال الشعوب = نامت على حرمانها والفار يلعن قطها
الفقر فقر المرجله والبخل عنوان العيوب = في راس تاجر لو تصيّح قملته ماقطها
خل الدراهم ياعلي واسرح مع الطيف اللعوب = طيف الغزال اللي فرض نفسه وكبدك بطها
لوجاك مهما جاك ماظنيت بك عنها تتوب = ياكثر ماتسهر لها والنوم دونك غطها
راع الهوى ياصاحبي يبدو على وجهه شحوب = لبيه ياجرح الغرام اللي لفا واختطها
ياعلي حط الجيب والرزاق علام الغيوب = واللي رفع راس الكبر ياعلي قل له وطها