صديت عن قلبٍ يعزك ويغليك = من بعد ما انت تدوره وين ماراح
اكيد في دنياك من جاء يسليك = حتى تركته بين همه والاتراح
لو هو بكيفي كان ماجبت طاريك= لكن شوق القلب للقلب فضاح
ودي بشوفك او للحظه احاكيك= واقول خذني معك يانورالاصباح
خذني معك لو طيف يتبع خطاويك = يمكن تطفّي نار في القلب تجتاح
وان كان في قلبك ولو بعض تشكيك= هذا نزيف القلب بالآه نضاح
وان كان قلبك مال فالله يهنيك= اقولها عن جد ما نيب مزاح
همي تعيش السعد فاله يخاويك= من وين ما يممت تلقاك الافراح
وانا ولو عشت العنا دوم ارجيك= في يوم ترجع لي فانا بعدك جراح