ياللي تقولين لي صوره بسلسالك = لك صورةٍ في حنايا الصدر محفوره
اعسها كل ماعاندني وصالك = وامسي وتصبح عروق القلب ممطوره
الله ياحظ النسيم اللي رفع شالك = عن غرّةٍ في سواد الليل مخموره
حبيبتي والله ان مولعك هالك = في وصلك اللي غدا همه ومحذوره
نسجت لك كل مايطري على بالك = من زعفران الحديث ودافي شعوره
لاتسأليني عن احلامي وعن حالك = وانتي غزايز عطا حبي وميسوره
حاولت اوصل احساسي بس ماطالك = احساسي اكبر من احلى الشعر وبحوره
وان كان انا حلمك المأمول وامالك = انتي نفس مهتويك وسيدة شوره
تبختري في معاليقي على فالك = وان شح بعض العطا كلٍ ومقدوره
وياللي تقولين لي صوره بسلسالك = انتي بدمك ولحمك فيّ منثوره