ياهيـه يلـي ماكلـه قشطـة التـاج=وشربه من الصحة وهرجـه غناجـة
وليا مشى كنه علـى فـرش ديبـاج=يادوب يطئ الارض والزيـن تاجـه
مثل الحمامة لا مشـت تـدرج ادراج=تخلف قلوب اهـل الهـوى بندراجـه
لبسه حرير ومركبـه صنـع ميـراج=جمس(ن) غريب الشكل صنع الخواجه
شغله على الريموت بادخال وخـراج=وزودن على الريموت كهرب زجاجه
ومـزودن تكيـف والبـدي لـعـاج=بيبانـه اللـي مادخلهـن عجـاجـه
لو طب له بارض(ن) قفارن وبطنـاج=من عجـه الـدلال ضيـع خراجـه
وسـط المدينـة ماتحـرك ولا مـاج=الا لتجهـيـز السـفـر والنهـاجـه
موديل عام الفين ومن احسـن انتـاج=مطلوب مـن كمـل جمالـه مزاجـه
اللي لـه الاضـلاع والقلـب ينبـاج=يسعد بشوفه لو ماخـذ منـه حاجـه
ابو خديد(ن) يسلب العقـل وحجـاج=وهدبـن مظاليلـن غطاهـن حجاجـه
انا اشهدنـه داخـل السـوق مـاداج=فـي منزلـه وياتيـه كـل احتياجـه
لاراح للدكتـور يبـي لـه عــلاج=مـن النظافـة والوقـايـه عـلاجـه
يفداه من هو ساكن(ن) ساحل العـاج=ويفداه من هـو ضاريـن بالمواجـه
ويفداه من هو ساكن(ن) حي سوهـاج=ديـرة هـل الدنيـا عيـال الدجاجـه
يهني مـن فـي حيهـا داج ثـم راج=من حولهـا والحـي داجـه وراجـه
وياناس انا بعده سجيـن يبـى فـراج=يالله بعـد صبـري تجيـب انفراجـه
هـذا شفـي والهـنـا دوم محـتـاج=وغيره من الخفرات عنـدي سماجـه
مـن السعوديـة ويسكـن بالافـلاج=ومن الحضارة صـار فيـه اندماجـه
الشاعر / ملفي مدله الروقي العتيبي