السلام عليكم ورحمة الله وبركاته
ها الابيات كتبتها لما ضاقت فيني من هم العزوبيه ، قلت لأحد الشباب وش السوات
قال اطلع فرفر يمين يسار تلقا وناستك خذيت برآيه ، مع إني عارف إن مافيه مكان للعزاب
أترككم مع الأبيات لعلها تنال القليل من إعجابكم
وآهمـٌـي اللي فاق كل التصاوير=حتى الأمل في داخلي صار مايل
حاستني الدنيا وحكـم المقادير = واصبحت للضيقه والاحزان شايل
سألت راع الخير راع التفاكير = الصاحب اللي يفرجه با الشكايل
ياصاحبي همـٌي يفوق التصاوير=ياكيف أزيله ياعريب السلايل
قال إن همـٌك تبعده با المشاوير=أطلع ، تحرك يصبح الهم زايل
شقتك هذي تحضر الهم تحضير = أطلع وتصبح للمسرات نايل
مشيت من عنده على تالي إعصير=من غير وجهه مالنا با الدلايل
جيت الحديقه بين ذيك النوافير = والجو فيها ياهل الخير هايل
دخلت لارجائه ومن غير تبصير = اقول جتني فرحتي با السهايل
جلست اناظر للفضاء والعصافير=واشوف كل الناس صايل وجايل
كسرت همٌي والهواجيس تكسير=مبسوط كني جالس(ن) وسط حايل
فجأه سمعت اصوات كنه أعاصير=من صوتهم تاقف طوآل الجدايل
أشكالهم تفـزع ، كانه مواصير=من شافهم ماشاف فيهم جمايل
قالولي أنهض وين جالس على خير=ماتدري إن المنطقه للعوايل
يا الله توكل دامنا نقول تحذير = من قبل والله ترتمي با الهوايل
قلت أبشرو واللي تريدون بيصير=وعادت همومي واصبح الحزن طايل
ورديت للشقه همومي طوابير = بركان حزني داخل القلب سايل
ذاك العزوبي لا نوى للمشاوير = يصبح مع الأحزان مثل الزمايل
فرصته با الشارع يشوت القوارير=وبا الزاويه يجلس بوقت القوايل
تحيتي لكل من عطر الصفحه بتواجده