[move=up]
اذا من الشعر ما ترجم الاحساس وش لي بـه
واذا الشاعر تجاهل حسّ غيره ما يصير انسان
هموم الوقت تجبرنـا نوضّـح وش عذاريبـه
وليش الناس رغم القهر تستانس على النسيان
قصيد الحـب ملينـا ولـو نطـرب لاساليبـه
بعضنا صادقٍ بالبوح يكتب شعـره الحرمـان
وبعضنا صفصفة هرجٍ تعرفـه مـن تراكيبـه
يبي ينقال شاعر كود يلقـى مدحـة النسـوان
وقصيد المدح ياكثره ويكشـف عـن اكاذيبـه
نفاق وهلس في الغالب لتاجر يبغـي الاثمـان
ابي شاعر يقول الحق مـا يجهـل مواجيبـه
ولكن دوم في عقله ولو هـو بالقهـر مليـان
ولا يوجّه تهم لانسان مهما بـان مـن عيبـه
يلوم الوقت فالشيهان يفهـم شـارة الشيهـان
يوعّي الناس باخطار الزمان وسـر الاعيبـه
ويوقظ في النفوس الدين يشرح هجمة الصلبان
يصحّي من تورط في المخدر وانسـرق جيبـه
وعقله راح لا حـي ولاميـت يعيـش جنـان
يبيع العرض أو يسرق ولا يدري من صحيبـه
غدا عبد المخدر راضـخٍ لامـره بلاعصيـان
ينبّه بنت ما تدري بشبـاب صـاع والخيبـه
يطارد في بنات الناس طعمه يغري الجوعـان
واذا منه خلص منها رماهـا وتفقـد الهيبـه
تصير بضاعة للسوق أو تقضي العمر باحزان
ترى شعرٍ بلا اهداف ولـو أعجبـك ترتيبـه
مصيره سلّة الاهمال ولو مـن قالـه فلانـان
.
وقد قام الشاعرمحفوظ ابو نايف بمجاراة هذه القصيدة بقصيدته :
علومك يالمهاجـر مابهـا شـكٍ ولاريبـه
تبدّى في مطاليعك وتعزف طيّـب الألحـان
ترى سوق المعاني يالسنافي صعب ترتيبـه
كما سوق البضاعه كل واحد ينزل الميـدان
وكلاً ياوسيـع المعرفـه يعـرض مجاليبـه
احد يطلع منه كاسب واحد يطلع منه خسران
احد يهجو عواذيله واحـد يمـدح معازيبـه
واحد يبدي بها بين العرب في عالي المزبان
وانا مالوم ذيبـاً فالخـلا يرسـل مقانيبـه
بعد فرقا وليفه راح يشكي لوعة الحرمـان
جريح القلب يالطير المهاجر صعب تطبيبـه
ومن لام المولّع ياوسيع المعرفـه غلطـان
ولا لوم الطليب اللي يدافـع عـن مطاليبـه
وياقف دون حقّه ما يفرِّط فيه مهمـا كـان
وياطيب الذي يبعد عـن البهتـان والغيبـه
ويازن كل كلمه قبل ينطقها علـى الميـزان
.
ورديـــــــــــــت عــــلـــــيـــــه
.
هلا بالغالي اللـي يامـر القيفـان وتجيبـه
يطوعها على كيفه بلمسـة شاعـرٍ فنـان
اذا منك نزلت السوق تنقّى ماعرف طيبـه
وتترك كل ما دونه فبيع الطيـب بـلأوزان
وبيع الجح بالاكوام مـا تـدري عذاريبـه
بعض مشموس والآخر تلاقي اغلبه خربان
خسارة تشتري بالكوم دامك عارفٍ عيبـه
ولو معروض وملمّع فزود الشئ كالنقصـان
فانا همي بشعر كالذهب ما يخسر اصحيبـه
ثبات كالجبل طول الدهر ما يدفنـه نسيـان
واذا هو مدحٍ للمكسب فهو رمشٍ بتركيبـه
يغيّر بين حين وحين مثل مكياج بالاوجـان
واذا هو طعم من داشر لريمٍ ينوي ايصيبـه
فحرام آضيّع اوقاتي واشجّع حصني جوعان
ابي شعر الرجال اللي وضوحٍ في مطاليبـه
على اليمّه دروبه خادمٍ للنـاس والاوطـان
[/move]
****************************
الشاعر الكبير الطائر المهاجر
عزف رائع على اوتار قيثارتك
يشدوا بكلماتك الرائعه ومعانيها الراقيه
سلمت يداك ودمت لنا