لا ياحبيبي لا تسافر وترحل = ملكتني واليوم بتغيب عني
لا ما هقيت الهجر منك بيحصل = ولا ضربت حساب طبع التجني
لامن ذكرت ايامنا اللي منول = حنيت مشتاق وعيوني بكني
ان كان قلبك ياحياتي تبدل = أنا بكم يازين ما خاب ضني
وان كان قصدك في جمالك تدلل = الله يزيدك من حلا الفن فني
وكان التغلي في خيالك تمثل = متى على خلك تروف وتحني
وان كان غرك هرج عاذل تبجل = في صورة الناصح وجاك متعني
طبع العواذل يا حبيبي تسلل = بين الحبايب بالنشايب تزني
دايم على عذل المواليف تعمل = عندي يعذلونك وعندك عذلني
ارجوك يالغالي علينا تجمل = أنا من اسبابك قصيدي يغني
من حبكم صرت بهواجيسي أغفل = محسوب بحساب المجانين كني
ولا اوحيت طاريكم يديني تبلل = من حر نيرانٍ بجوفي كوني
اصبر واداري عند ناس تعلل = أخفي هواكم غصب واضحك بسني
حبك ملكني وأنت بالكون أجمل = الله عطاك الحسن حسنك فتني
متى علي يازين تلفي وتقبل = هذا رجا قلبي وهذا التمني