[الطائر المهاجر]

مســـــــــــــــآء الخير للجميع ..

رائعه اتمنى ان ترضي ذائقتكم الشعرية

يانجد صيفك يقطع القلب حرّه = شتان ما بينك وما بين بيروت

أقفى ربيعك بالفرح والمسرّه =وصيفك وصل بالعج والحر والموت

جوٍ سموم القيظ دايم تكرّه = وإليا ركد ما كني إلا بتابوت

وإليا لحقني فيك بعض المعرّه = إسمحلي أرحل عن فيافيك بسكوت

شهرين ابيها منك فالعام مرّه =ألبس بها البنطال والبس بها الكوت

آخذ على لبنان والشام فرّه = وآكل من الرمان والخوخ والتوت

وأشوف ناسٍ فالبلد مستقرّه = سوو لهم فيها مقاييل وبيوت

وأمر دربٍ قدمي الزين مرّه = ياكثر ما شفته يجي فيه ويفوت

زين وغنج وعيون حلوه وغرّه = يمشي على كيفه مع الناس مفلوت

كنّه غرير ولاش علمٍ يغرّه = لا خاف من ربه ولاهوب مكبوت

علقني بسحرة وخيرة وشرّه = سحرٍ ذكر هاروت شرّه لماروت

وإليا إنتهى الميعاد بترك مقرّه = واعصي هوى قلبٍ منه صار مبهوت

واحزم شناط العفش والثوب أزرّه = وارجع بشوقٍ من مدى شوق بخوت

ويانجد صيفك لو ذبحني بحرّه = حييت في حضنك وفي حضنك الموت

من يعرف شاعرها لايبخل علينا بوضع اسمه للأمانه الأدبيه [/CENTER]

بواسطة لين شافوني سكتوا

وقد افاد الأخ منيع
اخي الكريم
الابيات
تنسب للشاعر/ صالح العصيمي
كل الشكر والتقدير لكم
تحياتي