قال الذي يبغي اختصارٍ ما يزيد=خير الكلام اللي يجيبه لايقا
ما كل ناظم نظم بابيات القصيد=او ساردٍ نثر بسلوكه صادقا
من قال انا ..مداح نفسه بالعديد=قِلة حقيقه في كثيره لاثقا
الناس تعرف ثم تحكم للرشيد=الرجل كانه واضحٍ وضح النقا
اتميز الصافي من انواع الحديد=الذهب الاحمر من صفاه البارقا
مخابر الرجال تخفا شي اكيد=ان بينت بالطيب نورٍ شارقا
وان بينت بالعكس شيٍ مايفيد=هذي هي العله وطبعٍ امحقا
ثم الكلام اللي احس انه سديد=المرجله الها مواري باللقا
يا ليل ضـافي والقمر فـيك صـافي=ليلة عشر واربع من ليالنا البيض
فيـك السوالف مع صـديقٍ اسنافي=تـطرد هموم الـقلب ويهيض تـهييض
وفيك الشعر يحلى ونظم القوافي=لا هـب نـسناس الـهوى زاد بالـفيض
بأعـلا عـروقٍ مـا تجيه الســوافي=وسـط النفود الـرمل ممحوض تمحيض
فـيه الـهبوب مـدغدغٍ بالـهفافي=يـطفي بـراده حر في جـمرة الـقيض
خـاطر خـطر للفكر وللبال لافـي=وفـزت قريـحة اجـهضت خـوش تـجهيض
ياليل ضافي والقمر فـيك صـافي=ليلة عشر واربع من ليالنا البيض
الا يا حسرتــي قـلبي معـنا=سبـايب من عنـه اقفـا ولاذى
جفاه ولا عليه اصـبح يحنــا=اضنه نـاوين لـه بالـجذاذى
قضـى عـمري وقلبي ما تهنـا=بـلا راحــة تـوذِّيه المواذى
حسـافه صـار بحبه لي يمنـا=روي الغصـن مكسي الــرذاذى
سبـا المحبوب عقلي لين جنـا=وخلَّا الروح في شفّ النفاذى
انا لـو هي غزاوي قلت فنــا=اخذت السيف من دون الخواذى
وركبت الخيل عجلٍ ما تونــا=اجيـبه في قويـاتٍ فـــذاذى
من اجل القلب بالعشق يتغنا=ويحيـا بالـتمتع والِّـذاذى
الا يا حسرتــي قـلبي معـنا=سبـايب من عنـه اقفـا ولاذى
يومٍ مـن الأيـام بالريـف دوار=كنت أتمشى بين دور السَّلايـف
بآثـار جدانـي تمعَّـنت نظَّـار=الله يسكنهـم بجنـه لفـايـف
آل الشويمان الذي فعلهم صـار=معلوم ذكره بالمجالس شرايـف
أسلاف وعزوتهم طويلين الاشبار=خلايفٍ منهـم رجـالٍ عسايـف
نظرت مجلسهم ووقفت محتـار=ذكرني فيهم والليالي العجايـف
محيينه الاجواد بعلوم الاخيـار=على الكرم اللي رقى بالنوايـف
ناسٍ الى من المسير لهم سـار=يلقا هلا ومرحب وجزل الصنايف
قدامه الدله بهـا البـن وبهـار=النار ما صارت عليها خفايـف
وقدامه المِطعَم به التمر سـرار=وقت المقيض وفي وقوت الخصايف
والحايل الجزله ذبيحة على النار=للظيف عادة ما تبعها حسايـف
حين الثليما عامرة فيها الأنـوار=بنوار أهلها وقتها كـان كايـف
هُم عمروها ثم حطَّولهـم كـار=كار المراجل في زمان الكسايف
وحلت بي العبره على ذيك الاثـار=وهلت دموعي فوق خدي ذرايف
قلت آه وا ويلاه كيف الزمن جار=آثارهـم صـارت هـدامٍ نسايـف
وين انت يالمسؤول اخونا المسلما؟=تفعل لك اسبابٍ مضاديـد غـارات
ما فيه احد بالحي ضنـي سالمـا=من البعوض اصبح بلا نوم بالذات
ليل ونهار يغيـر ويمـص الدمـا=وينقل لنا الامراض جرعات جرعات
ما نهتني جلسه ومن لدغـه نمـا=على الجلود الطفح وجروح خطرات
استبقوا الاحداث يـا ذخـر وحمـا=قبل يصير المجتمـع كلـه آفـات
اقضوا على الناموس رشو من سما=عليه في وكره من الريـد رشـات
تكفون واجبكم وقومـو بـه همـا=اجره من الله يكتبه لكـم حسنـات
مشتاق للبر الفسيح ونواحيه=مشتاق انا بالحيل لسهله وتله
انا اشهد ان البر اذا جيب طاريه=يفز قلبي حيث ذكره شفله
يا زين طلعاتٍ تجي في لياليه=ترد روحي لا الهبوب عتدل له
وقرص القمر وسط السما ساطعٍ فيه=سطوع نوره صافيٍ ماتمله
احط رحلي فوق عرقٍ يحليه=هبوبه المنعش روايحه فله
أشب ناري والحطب سمر شاريه=جمره حجر ناري يدوم بمحله
ودني المحماس والبن اسويه=والنجر والم دنته شاهدٍ له
حمسة محب الكيف وفنجال يرضيه=من دلة بالهيل تعطر محله
معي خويٍ مخلصٍ له وداريه=يسهر معي والمرجله ما تزله
سوالفه تحييي وسوالفك تحييه=عن الكرم والجود دقه وجله
وليا طلع صبحٍ يدب الحيا فيه=شمة نسيمه تشفي من فيه عله
عينك تمتع في ربيعٍ براضيه=زهر الخزاما والنفل مستحله
قال الذي شاب وتذكر لماضيه=ودع صباه ومشى بالشيب مشواري
وداع يا ماضي الطيبان وجلديه=وزبير وكعابها وعظيمها الساري
وم التسع والعبيسه وطاق طاقيه=والعابٍ اخرى توارت مالها طاري
كانت لنا العاب ضمن العاب شعبيه=في ماضيٍ من زمنا الغابر الواري
روح زمنها وودعنــاه كليه=واليوم صرنا بزمان علومه كباري
كوره ودوره مع سباقات دوليه=والعاب خطره على كثبان الاقفاري
بطر الحناتير مع دراج ناريه=وسط النفود ستباحت عرقه الصاري
الله يستر عليها من العطوبيه=ويستر علينا وعلى ركابها الضاري
فيها مكاين من الترهيم شريه=لا زمجر قزوزها كذح الشرر ثاري
سوت مضامير تشعطها سطاويه=بالمانعيه صباح وظهر وعصاري
مانيب حاسد ولكن العجب فيه=بس أتفكر بسخرة ربنا الباري
والمانعية بقت بقعه سياحيه=زوارها من قريب وبعاد الادياري
سلوى وتشجيع من يقدر بملويه=يطلع الى راس عرق الرمل متماري
لعبه جديده بهاذا الوقت دوريه=وسط صعافيق شرق المذنب إدياري