مذكرات طفل
الحلقة العشرة
كان ماني غلطان
عدنا لكم بعد استراحة لنكمل لكم الحديث عن صاحبنا
فقد قال لي : في يوم من ايام الشتا ء وكان ذاك اليوم ضباب
كثيف جانا النقل المدرسي الصباح بس متاخر نصف ساعة عن الموعد
المحدد والسبب انه ضيع الطريق بسبب الضباب
قال ضعت بس الآن خلاص تعدل راسي 0 قلنا الحمد لله
كالعادة ركبنا بالصندوق ومشى بنا الى المدرسة المدرسة تبعد عن
منزلنا حوالي عشر دقائق بالسيارة المهم رفيقنا اللي تعدل راسة
داعس بنا ومطب يشيلنا ومطب يحطنا والله راحت عشر دقايق ماجينا
المدرسة ربع ساعة شوي يوم رجع شوي وقف شوي والا هو جالس مثل العنز
اللي مضيعة شبكها مايدري وين ربه حاطه
شوي قال آه توني عرفت الطريق ويدعس بنا الى المدرسة طبعا هو
عرف الاتجاه حسب كلامه اثره لسى الثوارة براسة راحت ساعتين وحنا
ماغير هالمطاب كسرة ظهورنا وكل مطب ندعي عليه
اللي يقول جعل سيارة تنفقع واللي يقول ياربي انهم يفصلونه
المهم انقشع الضباب حوالي الساعة العاشرة والنصف
اثرنا قريبين للمدرسة نمر من جنبها ونتعداها
طبعا المدرسين اصلا ماصدقوا ان الجو كذا على شان يعطون الدوام اووووف ذاك اليوم
وحنا ما حصلنا الا المطاب اللي كسرتنا 0
ونقلني الى احداث بالمدرسة يقول كنا فالصيف كل فصل له طاسة
او غضارة حسب المسميات المهم يصبون فيها ماء ويضعونها
على النافذة من الخارج النوافذ خشب حتى يبرد الماء وبعض الطلاب من الفصول الاخرى فيه نذاله
يرمي بالماء طباشير 0
يقول لي في حصة القرآن نتعذر بالوضوء
ونذهب الى مزرعة امير القرية بجانب المدرسة تبعد عن المدرسة
نصف كم تقريبا ونتوضاء تقرب تنتهي الحصة وحنا ماردينا للمدرسة 0
ومن الاحداث اللي اضحكتني يقول في يوم من الايام
كنا جايعين بالمدرسة وكانت الحصة الثالثة وعندنا رياضة
وكان عددنا ثلاثةالمهم حارس المدرسة جهز الفطور للمدرسين
وضبط الشاهي وخرج من المدرسة راح للغنم قلنا ياشباب فرصه
الفطور جاهز وماباقي الا ان ناكله0
واحد يراقب واثنين يفطرون والله شوي وحنا قايلين بفطور المدرسين
ونرجع نكمل لعبنا لان مدرسنا غايب ذاك اليوم وماعندك احد
طلعوا المدرسين شوي يوم جاء المدير من اللي اكل الفطور
انتم مافيه غيركم قال واحد منا فيه شوي نذاله ايوه حنا اللي اكلنا الفطور
ليش قال ابو عوض هو اللي عزمنا على الفطور وحلف علينا
ومابغينا نقطع حلفة 0 ابو عوض الحارس0 المهم ابوعوض
اقشر جاء مع نهايه الدوام واثر المدرسين قايلين له
وفيه صله قرابه مع رفيقنا مادرينا قبل مايحط رجله رفيقنا على صدام السيارة يبغى يركب
الا ابوعوض ماسكة مع علباه وبالعصاء اللي معاه ليّن ظهرة0
(يتبع)