أطرد وراكم والمفارق ظليمه=الله على وقت التلاقي والأفراح
اليوم دمعي صاير(ن) مثل ديمه=والنفس عيّت دونك اليوم ترتاح
النور مطفي والليالي عتيمه=والناس من حولي غدو مثل الأشباح
ذاك الغلا ياليت ربي يديمه=الواحد المعبود خلاّق الأرواح
كنتي ولازلتي بقلبي مقيمه=وأنا أخايل بارق الطيف لالاح
وانتي بقلبي لك معزه وشيمه=عد النسيم وعد هبّات الأرياح
في ضامري نيران شوقي ضريمه=وماظنتي تنزاح لو راح ماراح
النفس ضاقت والمحاني هشيمه=ولازلت أعاني من هواجيس وجراح
والحب سنة خلق ماهو جريمه=لو كان حبك ياهوى البال ذباح
أرمي سلاحي وأعترف بالهزيمه=الله على وقت التلاقي والأفراح
[