يضيـق بالـي مـن الفـرقـى وطاريـهـا=ويرتاح بالـي ليا من شافتك عينـي
اشغلـت فكـري حبيبـي وش تواليـهـا=وفي غيبتك دمعـة الحرمـان تشقينـي
امشي مَعَ الناس لكن دون ما اوحيها=واشلـون ابنسـاك وطيوفـك تخاوينـي
إليا طرى أسمك دموع العيـن اخفّيهـا=خوفـي مـن العـاذل اللّـي مـا يدانينـي
وإليا طرت لـي وصوفـك جـل باريهـا=مـن فيـض زيـنـك تــوزّع للمزاييـنـي
تسبى النواظر بنعس اهـداب تسبيهـا=ومن بسمتك تخطف قلـوب الملايينـي
يا مهجة الروح روحي كيف تشقيهـا=صمتك ذبحني ونـار الشـوق تكوينـي
اقـرى الرسايـل لأجـل نفسـي اسليهـا=وأثـر الرسايـل عقـب عيـنـك تعنيـنـي
مـا باقـي الاّ طيـور الــورق الآحيـهـا=اذكـر بهـا احلـى الليالـي يـوم تغلينـي
بعـت المحبـه مـن اول كنـت شاريهـا=وعلى الوصل والموده كنت توصيني
ماتـت ورود الـغـلا مـاعـدت ترويـهـا=ماتت سبـب قسوتـك يـا نـازح البينـي
حتى العهود القديمـه صـرت ناسيهـا=ولاعـاد باقـي سـوى الـذكـر تقديـنـي
زادت جـروحـي ولا غـيـرك يداويـهـا=ليتـك تـشـوف الخفـايـا كــان تبكيـنـي
ضاقـت علـي الوسيعـه مَــعْ مبانيـهـا=اطوي سنين الرجـا واقـول يـا وينـي
قلبـي يحـبـك وعيـنـي سـاكـن ٍ فيـهـا=لاتـنـخـدع بـالـعـواذل والشيـاطـيـنـي
في روض قلبي ورودك ليت تسقيهـا=تعال واسقـي ورود الحـب واسقينـي
جاتك حروف الشّعر من قبل اسميهـا=دوّر عـبــاره تـواكــب للمضـامـيـنـي
مشاعـر ٍ مــا تـبـي يــا كــود غاليـهـا=وامنـتـك الله حبيـبـي لا تخلـيـنـي ..!!