[شاكـر محمـد]

لو تهت بوجوهك وكثر القابك=ما تهت عن طبعك وزيف شعورك
ماني مثل ناسك وجلّ أصحابك=تكويه ويدوّر رضاك يزورك
لي قلب رغم انه مرض باسبابك=لكن ما يرضى يطيع غرورك
ادري تبيّن به فعل مخلابك=ولولا ان لحمه مرّ صار سحورك
أنجاه ربي من حداد انيابك=والا انت لك شرعك ولك دستورك
ماتستلذ الا بقلوب احبابك=رغبه تدوّر من وراها سرورك
هذا قدوع وذا عشا لحسابك =وهذا غداك وذاك صار فطورك
والمشكله تسحر بطول اهدابك=وتذبح قلوب الناس نظرة حورك
وكلٌ درى عن فتنتك والعابك=ويجي لك اكثرهم يغرّه نورك
مثل الفراش يشوف ضوء شهابك=ويرمي بنفسه في لظى تنورك
تضحك له ويحسبك تبدي اعجابك=ضحكة اسد تخفي وراها جورك
يجيك كله يرتمي في بابك= ويسلّمك قلبه وهو ماسورك
متوهم انه فارس و يحظى بك= وانّه بيسكن في جنان قصورك
وانه بيقطف يانعات اعنابك= ويشمّ في خدّك عبير زهورك
ليما يظن محبته محرابك =وعشقه زوارق حضرتك وبحورك
حتى في احلامه تجيه اسرابك =وفجأه وهو محذوف خارج دورك
لاهو معه قلب ويعيش ان سابك=ولا هو بميّت واندفن بقبورك
وانا لو اني درت مع دولابك= ومسلّمٌ قلبي وطايع شورك
كانت بقايا منه تحت ترابك= وكان اني معلّق لرحمة طورك
اشكرك يا قلبي رغم ما صابك= ما بعتني للحب رغم كسورك
لما تعزويته وقلت اركابك=اركن على خيلٍ تعدّت سورك
*خيل المباعد ما التحقها نصابك=ولا هي فتوره تستبقها مهورك
ما قال غير ابشر وعدّ ازهابك=متحمل جروحه وناوي عبورك
وانا بربي محزمي متشابك=ونبلي وعقلي ما تتابع زورك
وأبشر تراني قد طويت كتابك=ولاهمني وغيبتك مثل حضورك