لايوجد اشد من ذكرى الطفوله على الأنسان الشاعر اذا كبر عمره ومر به الطريق على مكان تربى فيه ،،،،، وانا كذلك حين مريت على مدينة عين خالد غرب مدينة الدوحه قطر
مريت ماضي قديم وصابني شاضي = هاذي رسومه بقت والا اصلها وينه
دوجت فيها وبعيني شفت الانقاضي = لازال باقي والاخرى مالها عينه
يادار تكفين لون تحكيين عن ماضي = ماضي لنا فات قد قفت به سنينه
اذكر الا جا المطر يغط الارواضي = والبيت سقفه من الدنكل وتلبينه
وانا صغير مثل غيري بمركاضي = ويلمنا الليل خوف من معادينه
نسرح ونضوي وفكر الادمي فاضي = ماحاسب الوقت مافكر بتقنينه
ماهمنا الوقت كله مالنا حاضي = ماغير نلعب ونمرح فيه يازينه
ذكرت فيها لنا عودٍ مايعتاضي = وذكرت اخٍ عزيزٍ مع اخاوينه
وذكرت جيراننا والكل متراضي = ولف ومحبه هل الطالات مرسينه
خمسين عامٍ من الستين والماضي = اقفى به الوقت والذكرى عناوينه