[حرف وشعر]

من لا حفظ للجار حق (ن) وتوقير = هذاك عن سنع العرب فى خساره
الجار له شان (ن) وحق (ن) وتقدير= والرب وصى كل جار(ن) بجاره
اصبر على جارك ولو جاك تقصير= منّه ولو يحذف عليك الحجاره
سلم عليه وصبحه بالتباشير= ولاغاب عنّك بادره بالزياره
خلك مع الاحسان يافاعل الخير=من يفعل الاحسان نال الصداره
لاتتّبع اهل الزلل والمحاذير=واهل الجهل واهل السفه والدشاره
شتان مابين الرجال المناعير= واهل الحكى والفلسفه والفشاره
فى ذمتى بعض البشر تشبه الطير=عقبان وصقور ونسور وحباره
ومنهم خفافيش(ن) افطوس المناخير=منكسات(ن) فى بطون المغاره
ومنهم ارجال(ن) فى احلام العصافير=ومنهم احرار(ن) فى العزم والجساره
ومنهم ارخوم (ن) فاغرات المناقير=عند العفن تلقاه يقضى نهاره
والبعض عقبان(ن) تهب العوافير=ماتطلب الا من لذيذ المياره
وان استفزك جاهل (ن) بالتعابير= خله ولا تثنى علية العباره
واصحب رفيق الخير تلقى به الخير=ومن يصحب الملقوف يلقى دماره
ماكل من تنخاه وقت المعاسير= تلقاه فى وقت الشغف والعساره