[الطامي]

ياطول ماني مملٍ فيك يافهيد =والظاهر ان محمدٍ حاز الاول
ياذا الفهد ان كان يابوك بتصيد = الصيد والله عندنا لو تجوّل
الفيد ماهو صيد منتوقة الجيد = اللي معك وقتٍ ووقت تحوِل
والصيد طرد الرزق لامدة الأِيد=ولاحدٍ على رزق الخلايق تخوّل
الربح حفظ الدين هذا هو الفيد = ولطف وحنان وفعل ماهي تقوّل
لايافهد يابوك مجناك من حيد = معربٍ ساسك عمام ومخوّل
لاتخلف الهقوه وانا شبحي بعيد = فيكم،،وخل الناس منكم تهوّل
انذرك من خوة رجال هلابيد =يوم يراضونك وعشرٍ تفوِل
ولاترافق كل فاسق وعربيد = لانافعٍ نفسه ولغيره يعوِل
يخبرك عودٍ له تجاريب ويزيد = فعل ،،على من هو سعى له يطوِل
مايصله ياكون شرواه صنديد = يدرى مناقيد العرب والتسوِل
ياما قطعنا فجوجها نضرب البيد = ماحن بوسط اسواقها ونتجَوّل
وياما قطعنا هجعة الليل والغِيد = الهم يبرا والفكرله يموِل
نبغي الغناه ويغتبق راعي الديد = ونجود مما نحوش للي يتَنَوّل
حياة عز ولامذله وتناهيد = ويالله النجا لاجيت قبري محول