يابنت عفواً كان قصدك تسلين = ماني على خبرك بي انكاد واحزان
ادري جمالك يستثير الكثيرين = وغيري منك لحظه تخليه طربان
وانا لو اني شفت مدعوجة العين = جازيتها عن غمزة العين نسيان
من العام وانا داخل القلب جرحين = اقاسي الحسرات وجروح الازمان
اسهر وكل الناس بالليل نيمين = واجامل اصحابي ولو كنت طفشان
اكتب غزل من شان مااجرح عزيزين = واقول للعشاق هايم وغرقان
ماهو على شان البنات المزايين = المترفات اللي لهن بالغلا شان
خذيت منهن في زماني مضامين = وقطفت من ورد البساتين بستان
وليالقيت العاصية بالميادين = واللي جماله للمخاليق فتان
روضتها ترويض مهرة سلاطين = حتى تطاوع لي بلا قيد وعنان
على الشرف ماهو على درب عاصين= وعلى العوايد مانتعدى وننهان
واليوم مالي بالعذارى عناوين = خذيت من كل العناوين عنوان
ورضيت واللي يعطي الله يرضين = ولاني على شي من الوقت ندمان