من عطا بوش الاشارة وابتلى خلق الله = استدارت ريح الاردن تدعم النصراني
وابتدى حسني يصفق في ظلال الفله = وانتهى الليبي يهاجم جاره السوداني
يافهد كل العقول الباليه مختله = كل واحد بالجماعه مايطيق الثاني
وين كنا يوم دار اخواننا محتله = انشدوا سياف عنها وانشدوا رباني
كان زل الرافضي حنا علينا زله = اترك (المشرف) وراي( محمد العيباني)
ماذبحنا غير قولة ( مرحبا بهالطله ) = ماتشوف الناس دايم تدعم اللبناني
آه من ذيك الوجيه الساكنه بالتله = من يقارن بالدداسن صنعة الالماني
يافهد ماعاد فيها راي غيري خله = يكفي انك في بلدهم ماتشوف افغاني
التمشيخ للمشايخ وانت فرضك صله = لاتقول انه خدعني ناصر القزلاني
خل نصر الله يولي كان سيفه سله = لايردك غير بكره شاطي الليطاني
ناصر القزلان
افزعولي يا عيالي واضبطولي دلّه = دام ناصر سلّ سيفه داخل الميداني
يا محمد كان كلمت التميمي قلّه = ويش قصده يوم يلمس صاحبه عثماني
أدري إن الوضع مزري والعرب منحلّه = وأنت لك نيّه وحنا نعرف القوماني
انت ما شفت الضعيّف يوم دمعه هلّه =ضيّعه نصر الخسيس وطلّعه خسراني
ولا تقول القدس راحت وأرضها محتلّه = خابرينه من قديم وراحت الشيشاني
ما ذبحنا يا رفيقي غير قرص الملّه = دارنا راحت وحنا نأكل القرصاني
فهد الغنام
يافهد خل الاطباء يكشفون العله = ماتشوف الكوري اللي روع الياباني
وش يجيب العود الازرق في دخون الجلــّـه = والعروبه دم فاسد محرق ٍ شرياني
الحريري زوّد الكيله وشال الغله = واليماني كمل الناقص على الجيزاني
الدعاوي كل ابوها يافهد منشله = لاتفتحها علينا سكر البيباني
شاربين السم كاس وشاربين الذله = وان تكلمت المباحث دوروا عنواني
ناصر القزلان
من كلامك يا رفيقي ما عرفنا العلّه = لا تخلّينا نقوم نحفّر السيساني
من بغى شدّ الحبال ومن نوى في تلّه = يرفع البيرق ويمشي قايد الشجعاني
من تزعم للمعارك والسوالف هلّه = لا يجي بكره علينا يقلب الميزاني
وش كسبنا من سعاد ومن غناء شعبلّه =غير ضاع الشيخ معهم شيخنا الزنداني
مجلس الشورى خذلنا واطلبوا في حلّه = مجلسن فيه الذيابه تأكل الطلياني
فهد الغنام
شيخكم لوّ قال قوله ما برد في غلّه = حتى لوّ جهّز اخيوله وجاب اعناني
دام قايدكم يصيّح لا لمح في ظلّه = ما بقى غير العبيد تقارع الزيراني
ناوي (ن) حط المياسم بس فوق القلّه = ميسم (ن) واحد وأظنه يبري المرضاني
وكان تبي الحرب صامل يارفيقي يلّه =جهزّ العزبه وكلم ربعك العتباني
فهد الغنام
الصحافة عند هيكل واحمد الجار الله = والجزيرة بينت تركيبة السستاني
والاسد بشار دلى يرتعد من ظله = شفت رايس كيف تاطا هامة الغلطاني
الصليبي يجبر المسلم على سب الله = والحكومات العميله تحمي العلماني
والبعير اللي تهبد هات قيد افتل له = كلها لعبه سياسيه على الجيراني
ناصر القزلان
واصلو هالرقي الله يسعد هالوجيه ويسلم هالفكر
اخوكم نمر العتيبي