هذه الابيات اسندها علي احد الاصدقاء
تمضي سنين العمر وتقل الاصحاب=والادمي ربحه بالايام خافي
ابواب تقفل والولي يفتح ابواب=امراض تنزل والكريم المعافي
موقف يشد أعصاب ويريح أعصاب =والعمر مايبقى على طول صافي
ياصاحبي لاتحسب الظرف غلاب =لو هو جفاني الوقت ماني بجافي
قدرك بقلبي لو فتحنا له حساب=يملا البنوك ويغتنون الضعافي
ورديت عليه بهذه المتواضعه:
حي الكتاب اللي وصلني ولاغاب=راعيه عن بالي عسى ماخلافي
ومامن قريته لامس النوم الاهداب =ولامن تجاهل لا ولا به تلافي
قمت اتفكر وافتكر واسهب اسهاب=بين السطور الين حد الحوافي
وقمت احسب حسابي وانا حيل مرتاب=اخاف حبر الطرس يبدي نشافي
حيث ان ابو نايف مكانه بالالباب=ويقدح من افكاره بشعر خرافي
حاولت اجاري مابدابه ولااهاب=لانه رفيق لي ولو كنت حافي
عمر الفتى محسوب من رب الارباب= ياصاحبي ولكل الابحر مرافي
ماهي على ماقيل في فتل الاشناب=ولاهي تجي لك طوع لو جيت لافي
ان ميلت دنياك وكثرن الانشاب = فازبن على اللي في يديه الكفافي
ومانزله ربك من امراض واسباب=قادر على مانزّله له يشافي