[محمد اسماعيل الرفاعي]

يـا حِـبّي داب قلبك قسـى وإتناسى للريد أو نسى
ومركب جفاك فرد الشِراع خلانـي للنـوح والأسى
أنا مستحيـل أحقِـد عليـك وأندب وأقول علّ وعسى
لكين بقول ليك يا حبيب فوت ربنا يهوِّن عليك
وأنا من زمن ما قلتا لي ناوي الرحيل
عارف تمام ماك قِسمتي
وقدري العجيب في يوم غريب
بقاكا لي أقرب قريب ورماكا لي في سِكّتي
خلاني عشمان فيك كتير راجيك تفوح يوم كالعبير
تبقالي في عمري السمير تسعد حياتي ودنيتي
لكين وكت ناوي الرحيل فوت ربنا يهوّن عليك
وأن غايتو ما ندمان علي أيام كتيره سهرتها
ولا حتى جافتني النجوم الياما كم عددتها
وأيامي ما ضاعت سدى لا حاسي يوم بددتها
ومادام بقيت ناوي الرحيل فوت ربنا يهوِّن عليك
بكره بتحب زولاً سواي يديكا كل الفي مناك
وأنا غايتو زي حرمان علي أو مستحيل أعشِق سِواك
حأعيشو كُل عمري الفضل متمني تسعد في دناك
تفرح تعيش في هنا وسرور وأنا من بعيد بفرح معاك
ولسع بقول ليك يا الحبيب .. مادام خلاص ناوي الرحيل
فوت ربنا يهوّن عليك

7 /3 /2011م