الزواج للسعوديه من اجنبي عربي اوغيرعربي (مسلم)
 

وماهي الاثار الاجتماعيه والنفسيه علي الاطفال من خلال نظره المجتمع لهم

رد على: الزواج للسعوديه من اجنبي عربي اوغيرعربي (مسلم)
 

يعتمد
ان كان البنت طايح سوقها وخافت يضيع عمرها ولا عندها اخوان
يهتمون بها ، اذا كبرت :
فعلى ما قالوا اهل القصيم : ريحة ابو علي ولا عدموه
اما ان كان لا يزال امامها فرص فلا أرى ذلك .
فالأجنبي ماجا حب لعيونها .. جاي لمصلحة

رد على: الزواج للسعوديه من اجنبي عربي اوغيرعربي (مسلم)
 

[quote=المشرف العام]يعتمد
ان كان البنت طايح سوقها وخافت يضيع عمرها ولا عندها اخوان
يهتمون بها ، اذا كبرت :
فعلى ما قالوا اهل القصيم : ريحة ابو علي ولا عدموه
اما ان كان لا يزال امامها فرص فلا أرى ذلك .
فالأجنبي ماجا حب لعيونها .. جاي لمصلحة[/quote]


تسلم على الموضوع اخوي

وصراحه يامشرفنا اول مره اسمع هذا المثل مع اني من اهل القصيم

وعادي اذا المراه اخذت اجنبي

بالعكس ناعم وعندة رومنسيه غير السعودي

وقبل عدة ايام سمعت انه وحدة تطلقت وتزوجت سوري

واتوقع ان الاولاد بيكون عادي عليهم

رد على: الزواج للسعوديه من اجنبي عربي اوغيرعربي (مسلم)
 

من منطلق (ان جاءكم من ترضون دينه فزوجوه) لكن وجهة نظرى التى تساير العصر ومتقلباته أجد أن الافضل عدم خروج البنت من خارج عشيرتها أو قبيلتا
تأييدا للمثل المصرى (من ترك داره اتقل مقداره)
النمرة

رد على: الزواج للسعوديه من اجنبي عربي اوغيرعربي (مسلم)
 

"وصراحه يامشرفنا اول مره اسمع هذا المثل مع اني من اهل القصيم"
له .. له .. قصيميه ولا تعرف هالمثل
اجل تعرفين :
البيت اللي مابه بقوره ولا موره مابه ثموره
وإلا ما تعرفينوه؟
وينك عايشت بوه؟
اكيد بالرياض طوال عمرك وتخالطين اهل الحوطه

رد على: الزواج للسعوديه من اجنبي عربي اوغيرعربي (مسلم)
 

البيت اللي مابه بقوره ولا موره مابه ثموره
وإلا ما تعرفينوه؟

بعد ماعمري سمعته انا لاني من الرياض ولا الحوطه

حتى اسال زوجي وهو قصيمي اب عن جد يقول ماعمري سمعته يقول شكله مثل سوري

هههههههههههههههههههه

رد على: الزواج للسعوديه من اجنبي عربي اوغيرعربي (مسلم)
 

أجل انا اللي من القصيم
وانتي وزوجك منتم من اهل القصيم ..
أجل ما تعرفين المراهن اللي صار بين قصيمي وشقراوي
الشقراوي قال للقصيمي : ابثبت لك ان حرمتك توهوه ، يعني تقول وه وه ..
قال اتحداك ، قال له مشينا وابطق على بيتكم وانت لاتقول شئ
وراحوا ، وطق اشقراوي بيت الرجال ، فردت الحرمه : من عند الباب
قال فلان بوه ، قالت لا مهوب به ، قال واخوه ، ردت : وه وه ..
وكسب الشقراوي الرهان..
واذا تبين المزيد من امثال وحكم القصمان وسواليفهم تراها واجد ..

رد على: الزواج للسعوديه من اجنبي عربي اوغيرعربي (مسلم)
 

واذا تبين المزيد من امثال وحكم القصمان وسواليفهم تراها واجد ..

ياليت تحضر المزيد من الامثال

اكون شاكرة

واحتمال ناس وناس تقوله عن انا ماقد سمعته

لانه احتمال اهل بريده تكون هذي امثالهم بس عنيزة مااسمع هذي الامثال

رد على: الزواج للسعوديه من اجنبي عربي اوغيرعربي (مسلم)
 

لا بالله انا عشت طفولتي بين اهل عنيزه واهل بريده ويوم كبرت مع اهل الرس واهل المذنب ..
ففي الرياض كنا بحارة القصمان وهي تقع شرق البطحاء ، حتى لو جلست مع قصيمي
يظن اني من الجماعه .. لأن اول كانت الشوارع سكيك ، والبيوت متلاصقه ، وفي الديرة
عشت مع أهل الزلفي وهم يشابهون القصمان في الكثير من النواحي حتى في بعض اللهجه .
اذا بغينا نضيق صدر زميلنا القصيمي كنا نقول له :
الفاروه بالدرجيه ، هات السلاح نكستله ..
وهي من الهرج البرئ ، لكن هناك الكثير من الهرج غير البرئ ..

وإلا اهل سدير ما نخليهم :
انحن يهل سدير مانحب اكل الحبحار.....

وإلا اهل شقرا : أهل البيزه ..

كنا بزارين فاضين وما عندنا إلا نتعير بالآخرين ..

رد على: الزواج للسعوديه من اجنبي عربي اوغيرعربي (مسلم)
 

زواج السعوديه من أجنبي
من سلبياته
1 مسألة الاختلاط التي لم تتعود عليه الفتاة السعودية ولم تألفه أو تأخذ عليه كما هو الحال مع الفتيات من جنسيات أخرى.
2 الامتيازات التي تأخذها الفتاة السعودية بحكم جنسيتها السعودية قد تفقدها في حالة زواجها من الأجنبي كونها سوف تتبع زوجها من حيث الجنسية وكل الأحكام المتعلقة الصادرة من بلد زوجها وتظل هذه الاعتبارات هاجساً مقلقاً للفتاة لأنها تظل بشكل عام أقل مما سوف تحصل عليه.
3 مسألة الأولاد وأحقيتهم في إكمال دراستهم الجامعية إذ إنه من المعروف أن الدراسة بالجامعة في المملكة العربية السعودية قاصرة على السعوديين والسعوديات.
4 نظرة المجتمع لها ولأولادها وإن كانت تلك المسألة نسبية إلا أنها موجودة.
5 شعور الفتاة وليس كلهن بالطبع بأن الزوج الأجنبي قد يتزوجها طمعاً في مالها.
6 الخوف على مصير أطفالها في حالة حدوث طلاق وانفصلت عن زوجها فهل سيكونون معها أم يصر والدهم على أخذهم معه إلى بلده.
7 الشعور بأن هناك آثار مستقبلية سلبية سوف تنتج من زواجها للأجنبي تكمن في عدم قدرتها على التكيف مع مجتمع الزوج وبالذات أثناء العطل الرسمية والذهاب لبلده.
8 مسألة تقبل أهلها للزوج الأجنبي قد تكون موضع تفكير عميق لأنه ليس من ابن البلد وسوف يعاملونه على أنه أجنبي.
وبصراحة الافضل كل واحد يتزوج من بلده لان اختلاف البئيه والعادات والتقاليد قد تكون سبب في عدم
استمرار الحياة الزوجية والضحية الابناء
شكرا د. الوليدي طرح رااائع لقضية انتشرت في هذا الزمن
دمت بخير